“Tukamonana mu Bufumu bwa kwa Lesa”

“Cibusa Watemwikwa Rupert! Lelo bacimpingula ukunjipaya. Windilila ubulanda. Nakuposha, naposha na ba pa ng’anda bonse. Tukamonana mu Bufumu bwa kwa Lesa.”

IFI e fyo Franc Drozg alembele pa June 8, 1942, ilyo fye abashilika baNazi bashilamupika imfuti. Mulandu nshi bamwipaile?

Ukulingana ne fyalembwa fya mu ng’anda ya babenye iya Museum of National Liberation iya ku Maribor, Slovenia, uyu kafula wa myaka 38 akene ukwingila mu kalibumba ka bushilika aka bena Germany mu Slovenia aka Wehrmannschaft. Ali ni Bibelforscher, nangu Umusambi wa Baibolo, nge fyo Nte sha kwa Yehova baishibikwe muli ilya ncende. Pa kuti engacita ifyalembwa pali Esaya 2:4, tayafwilishe amatukuto ya nkondo ya baNazi, pantu umwine atile mutekwa wa Bufumu bwa kwa Lesa.—Mateo 6:33.

Mwi tauni aleikala ilya Ptuj, Franc aishibikwe ukuti ali ni kabilisha wapimpa uwa mbila nsuma iya Bufumu bwa kwa Lesa. (Mateo 24:14) Te mulandu na mafya ayengi, aleshimikila imbila nsuma ukwabulo kuleka ukufikila ilyo bamwikete mu May 1942.

Inte sha kwa Yehova abengi ku Slovenia balipakeswe icabipisha ku baNazi. Franc ali pa ba ntanshi ukwipaiwa pa mulandu wa mipepele asuminemo. Ukupala Abena Kristu ba mu mwanda wa myaka uwa kubalilapo, alikoseleshiwe ku mashiwi ayatila: “Tuli no kwingilila mu bufumu bwa kwa Lesa mu bucushi ubwingi.” (Imilimo 14:22) Ukucetekela kwakwe mu buteko bwa ku muulu ukuti bwa cine cine kwashininkishiwe mu mashiwi yakwe aya kulekelesha aya kuti, “Tukamonana mu Bufumu bwa kwa Lesa.”

[Abatusuminishe Ukubomfya Icikope pe bula 32]

Franc Drozg: Photo Archive-Museum of National Liberation Maribor, Slovenia; kalata: Iyo ailembele yasungwa mu ng’anda ya babenye iya Museum of National Liberation Maribor, Slovenia