“Mu Lubuuto Lwenu E mo Tumweno Lubuuto”

ILINGI tatupoosako amano ku lubuuto mpaka amalaiti yaya na mu mushi mwafita na fititi e lyo tumona ifyo yacindama. Icawamako fye ca kuti “Icitesheni ca malaiti ica mu muulu,” e kuti akasuba, kalishintililwapo umupwilapo. Kabili pa mulandu wa kasuba, tulamona, tulalya, tulapeema, kabili tuli bomi.

Apo ulubuuto lulakabilwa sana mu bumi, tatufwile ukusunguka ilyo twabelenga mwi buuku lya Ukutendeka ukuti ulubuuto lwamoneke pa bushiku bwa kubalilapo ubwa bubumbo. “Lesa atile, napabe ulubuuto, e lyo pali ulubuuto.” (Ukutendeka 1:3) Abaume ba bukapepa pamo nge Mfumu Davidi lyonse basumine ukuti Yehova e ntulo ya bumi no lubuuto. Davidi alembele ati: “Kuli imwe kwaba akamfukumfuku ka mweo, na mu lubuuto lwenu e mo tumweno lubuuto.”—Amalumbo 36:9.

Amashiwi ya kwa Davidi yalanda pa lubuuto lwa cine cine no lwa mampalanya. Icitabo ca Encyclopædia Britannica citila: “Ulubuuto, cine cine e lulenga tulemona.” Lyene cisosa no kuti: “Ifyebo ifingi fifika kuli bongobongo ukupitila mu kumona ukucila ukutonya, ukununsha, ukumfwa no kusonda.” Apo ifingi ifyo tusambilila fishintilila pa ca bupe ca kumona, icikabila ulubuuto pa kuti ifintu fimoneke bwino, Amalembo na yo yalilandapo pa lubuuto lwa mampalanya.

E co, Yesu aebele abasambi bakwe ukuti: “Ni ne lubuuto lwa calo; uukonka ine takende mu mfifi, lelo akaba no lubuuto lwa mweo.” (Yohane 8:12) Ulubuuto lwa mampalanya ulo Yesu alandilepo lwali bukombe bwa cine ico aleshimikila, icabuutwishe imintontonkanya ne mitima ya balemukutika. Pa numa ya kwikala mu mfifi ya ku mupashi pa myaka iingi, abasambi ba kwa Yesu kuli pele pele balyumfwikishe ubufwayo bwa kwa Lesa ubwa muntunse ne subilo lya Bufumu. Ici cali “lubuuto lwa mweo” icine cine, pantu uku kwishiba kuti kwalenga umuntu ukukwata umweo wa muyayaya. Mwi pepo kuli Wishi wa mu muulu, Yesu atile, “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Shi twisuula ulu lubuuto lwa ku mupashi!