“Kwena, Uyu Muti Kuti Wakukalifya Umubili”

BUSHE mwalyumfwapo ayo mashiwi? Nalimo dokota nelyo nasi alimwebapo ifi ilyo ashilamupeela umuti wa kumuundapa.

Kwena tamwakeene uyo muti pa kuti fye mwiumfwa ubukali bamwebele. Lelo, mwalishipikishe ubukali pa kuti mupole. Limo, nangu line tacaseeka, ukusumina nelyo ukukaana ukuundapwa kuleta ubukali kuti kwalenga mwatwalilila abomi nelyo mwafwa.

Nangu line te lyonse tukabila ukuundapwa na dokota, apo bonse tatwapwililika, tukabila ukusalapulwa, nelyo ukulungikwa, nangu ni kulya uko limo kwingatukalifya. (Yeremia 10:23) Baibolo ikomaila pa fyo ici cacindama ku bacaice, ilyo itila: “Ubupumbu bwakakatila ku mutima wa mwaice; lelo inkonto ya kulimuna kuti yabutalushako.”—Amapinda 22:15.

Inkonto tulelandapo pano, ileimininako ubulashi bwa bafyashi. Ca cine banono abaice abatemwa ukusalapulwa. Nga muli ukukandwa kumo, napamo kuti bakupata. Lelo, abafyashi ba mano kabili ababa no kutemwa tabatontonkanya ukuti umwana alakalipa nga bamusalapula, lelo, bapoosa amano pa busuma bwisako nga bacite co. Abafyashi ba Bwina Kristu balishiba ukuti Icebo ca kwa Lesa calilungika ukusosa ati: “Ukufunda konse ilyo kubapo kwena takumoneko kwa kusekelela, kuba fye ukwa bucushi: lelo abafundwako, apo inshita yapita, kutwalako icisabo ca mutende, ica bulungami.”—AbaHebere 12:11; Amapinda 13:24.

Kwena, te baice beka bakabila ukusalapulwa. Na bakalamba bene balakukabila. Baibolo ilanda pa bakalamba ilyo isosa ati: “Ikatisho kusalapula kwandi, witompokako, ukulinde; pantu kwene mweo obe.” (Amapinda 4:13) Ca cine abantu ba mano—abaice na bakalamba—bakomfwila ukusalapula kufuma mu Cebo ca kwa Lesa, Baibolo, pantu ukucite co kukabaka imyeo yabo.