Bushe Tulingile Ukupepa Kuli Bamalaika Ukuti Batwafwe?

BUSHE caliba fye bwino ukupepa kuli bamalaika ilyo tuli na mafya? Abantu abengi batontonkanya ukuti caliba fye bwino. Na kuba, New Catholic Encyclopedia itila: “Umuntu apepa kuli . . . bamalaika . . . mu mano ya kuti batupaapaatileko kuli Lesa.” Bushe tufwile ukupepa kuli bamalaika ukuti batupaapaatileko kuli Lesa?

Icebo ca kwa Lesa catupeela amashina ya bamalaika babili fye aba busumino, Mikaele na Gabriele. (Daniele 8:16; 12:1; Luka 1:26; Yuda 9) Apo aya mashina yalilumbulwa muli Baibolo, kuti twashininkisha ukuti malaika umo umo cibumbwa ca ku mupashi icaibela, te maka fye yamo ayacila pa ya buntunse. Lelo, bamalaika bamo balikeene ukusokolola amashina yabo. Ku cakumwenako, ilyo Yakobo aipwishe malaika wamutandalile ishina, alikeene ukumweba. (Ukutendeka 32:29; Abapingushi 13:17, 18) Baibolo tayatupeela umutande wa mashina ya bamalaika, ne ci calenga abantunse ukukanacishamo ukucindikisha bamalaika.

Pa milimo bamalaika babomba paba no mulimo wa kutwala ubukombe ku bantu ubufuma kuli Lesa. Na kuba, amashiwi ya kubalilapo aya ciHebere ne ciGriki ayapilibulwa “malaika” nga kuyakonka fye yapilibula “inkombe.” Lelo, bamalaika tababomba nga bakawikishanya aba kututwalila amapepo ku cipuna ca Wapulamo. Lesa afwaya ukuti tulelungatika amapepo yesu kuli wene mwi shina lya Mwana wakwe, Yesu Kristu, uwatile: “Pa kuti conse ico mwalomba Tata mwi shina lyandi, akamupeela.”—Yohane 15:16; 1 Timote 2:5.

Yehova Lesa tapamfiwa sana ica kuti te kuti atukutike ilyo twamulomba bwino. Baibolo yatulayo kuti: “Yehova ali mupepi kuli bonse abalilila kuli wene, kuli bonse abalilila kuli wene mu cishinka.”—Amalumbo 145:18.