“Ukulenga Ishina lya kwa Yehova Ukwishibikwa”

ICALO fye conse apo capela, bamagazini ba Ulupungu lwa kwa Kalinda pamo pene na Loleni! balicindikwa apakalamba ku musango wa fya ku mupashi filembwamo kabili no bucindami bwabamo. Uubelenga bamagazini bene aba mu France nomba line fye alandile pa fyebo fisuma ifilembwa muli aba bamagazini ilyo alembele kalata yatile:

“Ndi mukashana, nafuma ku Afrika, kabili nshasoma sana. Tapalakokola sana, natendeke ukubelenga bamagazini wenu. Amalyashi nalebelengamo yalensenda sana. Ninsango kuti ukubelenga kwalicindama. Ndemutasha, ninsambililako amashiwi yamo yamo ica kuti pali ino nshita nga nalemba kalata muba fye utulubo tunono.

“Ndapapa icine cine pa kumono kuti mulemba amalyashi yalekanalenana ayalanda pa bantu, pe sonde, e lyo na pali Kabumba. Aya malyashi yalilembwa bwino sana ica kuti yalenga umuntu ukutemwa ukubelenga. Takwaba nelyo umo uwafikapo ukusambilisha abantu bonse aba misango yonse pa nshita imo ine.

“Cimbi icansungusha ca kuti namona ukutila fyonse fi ilyo filembwa tafilembelwa ukusangamo indalama lelo filembelwa ukwishibisha ishina lya kwa Yehova. Ninjishibo kuti ni Yehoba e wamusuminisha, e co namutashisha. Shi Kabumba alemupa amaka ya kusambilisha.”

Inte sha kwa Yehova pali nomba balebombo mulimo wa kusambilisha Baibolo mu fyalo 235. Ulupungu lwa kwa Kalinda lulembwa mu ndimi 148 e lyo Loleni! ni mu ndimi 87. Ishi mpapulo tashilembelwa ukupeela umuntu nangu umo ubukata. Ifyo bamagazini bafundisha fifuma muli Baibolo kabili ifyebo fipya ifisangwamo fyalembelwa ku kucindika Kabumba, uwatila: “Ine ndi Yehova . . . uukusambilisho kuti ucenjele.” (Esaya 48:17) Shi namucenjele ku kubelenga Amalembo ya Mushilo lyonse ne fi ifya kumwafwa ukusambilila Baibolo.