“Fwayenimo Uwayana”

DAMASEKE wali musumba umwali ulubanda mu nshita sha batumwa. Amabala ya miti ya fisabo yashingulwike umusumba, ne ci calengele umusumba ukuba cifulo ca kutuushishapo ingamali ishalefuma ku fyalo fyabelele ku kabanga ka Damaseke. Tapakokwele apo Yesu Kristu afwilile, icilonganino ca Bwina Kristu calipangilwe mu Damaseke. Pa bali muli ci cilonganino pali na baYuda abo nalimo basangwike abakonshi ba kwa Yesu pa nshita lintu kwali Umutebeto wa Pentekoste mu Yerusalemu mu 33 C.E. (Imilimo 2:5, 41) Abasambi bamo abafumine ku Yudea nalimo baselele ku Damaseke lintu ku Yudea kwali ukupakasa pa numa ya kupoola Stefani amabwe.—Imilimo 8:1.

Napamo cali mu mwaka wa 34 C.E., e lyo Umwina Kristu we ishina lya Anania uwa ku Damaseke bamupeele umulimo waibela. Shikulu amwebele ati: “Ima, kabiye ku musebo uwitwa Uwaololoka, na pa ng’anda ya kwa Yuda ufwaye umuntu ishina lyakwe Sauli, uwa ku Tarsi. Pantu, mona! alepepa.”—Imilimo 9:11.

Umusebo waleitwa Uwaololoka wali bakilomita 1.5 ukulepa kabili walalenye mu kati na nkati ka Damaseke. Nga twamona ifyalengelwe muli ba1800 ifili pali lino ibula, kuti fyatwafwa ukwishiba ifyo umusebo walemoneka mu nshita sha pa kale. Anania afwile aliculile pa kusanga ing’anda ya kwa Yuda. Icalengele ni nshila umusebo wapangilwemo. Na lyo line, Anania alisangile umusebo, kabili icafuminemo mu kutandala kwakwe ca kuti Sauli asangwike umutumwa Paulo, kabila wapimpa uwa mbila nsuma.—Imilimo 9:12-19.

Yesu atumine abasambi bakwe kabili abebele ati: “Fwayenimo uwayana” uwingakutika ku mbila nsuma. (Mateo 10:11) Anania afwile aile fye umwine mu kufwaya Sauli. Inte sha kwa Yehova na bo mu nsansa balaya balefwaya abayana nga filya Anania acitile kabili balatemwa lintu abantu bapokelela imbila nsuma iya Bufumu. Tacaba kuicusha fye ukuya balefwaya abayana.—1 Abena Korinti 15:58.

[Icikope pe bula 32]

“Umusebo witwa Uwaololoka” pali leelo

[Abatusuminishe Ukubomfya Icikope pe bula 32]

Ukufuma mu citabo ca La Tierra Santa, Ibuuku 2, icalembelwe mu 1830