Inshita ya Kulya Te ya Kulya Fye!

UULI onse alaipakisha ukulya ifya kulya ifisuma. Nga ca kutila mulaipakisha ukulanshanya e lyo no kubishanya kusuma na bo mwatemwa ilyo mulelya, ninshi ukulya takuba kwa kupwisha fye nsala. Indupwa ishingi shalitemwa ukuliila pamo nangu fye umuku umo mu bushiku bumo. Inshita ya kulya ilapeela ishuko ku ba mu lupwa ukulanshanya pa fyacicitika ubo bushiku nelyo ifyo balefwaya ukucita. Abafyashi abakutika ku fyo abana babo balelanda ne fyo baleilumbulwila, baleshiba ukutontonkanya kwabo ne fyo baleyumfwa. Mu kuya kwa nshita, ukubishanya kusuma ukuba pa kulya kulenga ulupwa ukuba ulwacingililwa, ulwacetekelana, kabili ulwatemwana, ne ci cilenga ukuti lube ulwashikatala kabili ulwaikatana.

Muno nshiku, pa mulandu wa kuti abantu abengi balipamfiwa kabili balendauka, calyafya ku ndupwa ukuba ne nshita ya kuliila pamo. Mu fyalo fimo, intambi tashisuminisha aba mu lupwa ukuliila pamo nelyo fye ukulanda pa kulya. Indupwa shimo shalitemwa ukwasha TV ilyo balelya, ne ci cilenga ukukanalanshanya.

Lelo, abafyashi ba Bwina Kristu baliba abaiteyanya lyonse ku kubomfya amashuko yonse ku kukuula ulupwa lwabo. (Amapinda 24:27) Kale, abafyashi baebelwe ukuti inshita isuma sana iya kufundisha abana babo icebo ca kwa Lesa ni lintu ‘bekele mu mayanda yabo.’ (Amalango 6:7) Ukuliila pamo lyonse kulapeela abafyashi ishuko lyaibela ilya kufundisha abana babo ukutemwa sana Yehova ne fishinte fyakwe ifyalungama. Nga mwaba ne mibele isuma kabili aba nsansa, kuti mwalenga inshita ya kulya ukuba inshita ya kuipakisha kabili iya kukosha ulupwa lwenu. Kanshi, lekeni ukuti inshita ya kulya iba ya kulya fye!