“Mulelola”

KU KALE, abalinshi balebombela pa mpongolo ya musumba na pa mpongolo ye tempele, limo limo balesangwa na pa miinshi ya mayanda yamo. Baleisala impongolo ilyo bwaila no kubomba umulimo wa bulinshi. Uyu mulimo wali uwacindama sana, uwalebomba ubulinshi muntu uo bacetekela sana, pantu umulinshi e walepunda no kusoka abantu nga amona kwaisa abalwani pa kuti umusumba wisanswa.

Yesu Kristu alishibe umulimo wa mulinshi. Inshita imo, apashenye abasambi bakwe ku balinshi no kubakoselesha ukuba abalola mu nshiku sha kulekelesha isha bwikashi bwa baYuda. Atile: “Cenjeleni, loleni, mulelola, pantu tamwaishiba ilyo inshita yasontwa ikabako. Cili kwati muntu uwaleya ku calo ca kutali uwashile ng’anda yakwe . . . aebele uwa pa mwinshi ukuti alole. E ico loleni, pantu tamwishibe ilyo umwine wa ng’anda akesa.”—Marko 13:33-35.

E fyo na Ulupungu lwa kwa Kalinda lwacita. Nomba imyaka naicila pali 125 ukutula apo lwatendekele ukukoselesha abantu ukucita filya Yesu alandile ukuti: “Mulelola.” Nga lucita shani fyo? Nga filya fine balondolola pe bula 2 ilya uno magazini, “Lubebeta ifilecitika pano calo no kumona ifyo filefikilisha ukusesema kwa mu Baibolo. Lusansamusha abantu bonse ne mbila nsuma ya kuti Ubufumu bwa kwa Lesa bwalaswa bonaule abafyenga abantu banabo no kuti bukalenga isonde ukuba paradise.” Mwi sonde lyonse, lupulintwa ukucila pali 26,000,000 mu ndimi 150. E magazini fye yeka iya mapepo iisabankanishiwa ukucila bamagazini bonse pano isonde. Inte sha kwa Yehova, ukupala abalinshi ba pa kale, babomfya Ulupungu lwa kwa Kalinda ku kucincisha abantu konse uko bekala ukuba ‘abalola’ lwa ku mupashi pantu Shikulu Yesu Kristu, ali mupepi no kubwela ukuleta ubupingushi pali buno bwikashi.—Marko 13:26, 37.