Nani Akaliisha Icalo Conse?

UKULINGANA no kutunganya kwa ba World Food Programme, icipani ca ba United Nations icibomba umulimo wa kupwisha insala, abantu amamilioni 800—sana sana abana—bali mupepi no kuponenwa ne cipowe. Nomba line, ici cipani catile indalama na fimbi ifyo ifyalo fyakwatisha indalama fyali no kubomfya ku kucefyako ubu bwafya, fyabomfiwe sana ku kupwisha ubwafya bwalekanalekana bumbi, pamo ngo kusansa kwa tupondo. Ukwanana kwa malwele ya lwambu nakulenga ubwafya bwa nsala ukukulilako. Lipoti ya Global School Feeding iya ici cipani yalandile pa fyalo fya mu Afrika umwaba sana ubulwele bwa AIDS ukuti: “Abafyashi abengi balefwa kuli AIDS ilyo bacili fye abaice. Abana basha ilingi line bashala fye baleimwena abene, abengi tapaba ico baishiba pa bulimi nelyo kubomba imilimo ya cila bushiku iyo bonse fye basambilishiwa ukubomba.”

Icipani ca World Food Programme ciletwala pa ntanshi umulimo wa kulapekanya ifya kulya mu masukulu nangu fye umuku umo cila bushiku. Te mu kuti balefwaya fye ukucefyako insala iyo, lelo na kabili ni co ukupitila mu kulasambilisha abantu lyonse balefwaya ukucincisha ifipani finono fimbi ifyabelako ku kucilikila imisepela ukwambula akashishi ka HIV akaleta ubulwele bwa AIDS.

Uko ifipani finono fyaba, imisepela balapokelela ifya kulya, balisambilishiwa bwino ifya kuisunga abene, kabili balyafwiwa na mu nshila shimbi. Kabili casangwa ukuti uko abantu baalula imibele yabo, ukwambula akashishi ka HIV akaleta ubulwele bwa AIDS kulacepa.

Ku ca bulanda, mu matukuto ya bantu mulaba akapaatulula kabili tayapwishishisha icili conse. Lelo mu Baibolo mwaba ubulayo bwa kusansamusha ubulanda pa kupwisha ubwafya bwa nsala umupwilapo. Pa Amalumbo 72:16 patila: “Mube ukupaka kwa ngano mu calo.” Ilyo Ubufumu bwa kwa Lesa bukalateka abantu bakasosa ulwa kwa Yehova Lesa abati: “Mupempule calo, no kucipakisha . . . Mubapeele ngano; pantu e fyo muciteyanya.”—Amalumbo 65:9.

[Abatusuminishe Ukubomfya Icikope pe bula 32]

WFP/Y. Yuge