Umwina Afrika Uwaicefya Uwatemenwe Icebo ca kwa Lesa

ABATANDALA ku Afrika balapapa ukusanga ukuti calyanguka ukutendeka ukulanshanya ifya mu Baibolo na bantu ba mu Afrika. Amepusho pamo nga, “Ubufumu bwa kwa Lesa cinshi?” nelyo “Bushe pali icingacitwa ku kupwisha ubwafya bwa kucepelwa kwa fya kulya, amalwele, inkondo, no lukaakala?” yalenga abantu abengi ukufwaya ukukutika. Abengi balasuminisha umuntu uo bashaishiba ukubalanga amasuko ya mu Baibolo ku mepusho bakwete. E ico kanshi kulaba ukutendeka ukusambilila Baibolo. Kabili ilyo umuntu aishibako ifingi ifya muli Baibolo, alabatishiwa no kuba Umwina Kristu.

Umwina Afrika umo uwa kubalilapo ukucita ica musango yo alilumbulwa mu Baibolo pa Imilimo 8:26-40. Ali mwaume uwa ku Etiopia uwaile ku Yerusalemu mu kupepa Lesa wa cine Yehova.

Nga fintu icikope cilelanga, uyu mwina Etiopia alebwelela ku mwakwe kabili ali mwi celeta lyakwe alebelenga icimfungwa. Umuntu uo ashaishiba apalama kuli wena no kumwipusha ati: “Bushe cine cine nawishiba ifyo ulebelenga?” Mu kuiceefya, umwina Etiopia asumina ukuti alekabila ubwafwilisho, kabili alomba ulya muntu uo ashaishibene nankwe, Filipi Umwina Kristu kabili kashimikila wa cebo, ukuti anine mwi celeta. Lyene alomba Filipi ukuti amulondolwele umulolele Ilembo lintu acilabelenga. Filipi alondolola ukuti, uku kusesema kulelanda pa mfwa yacitike nomba line iya kwa Mesia, Yesu Kristu. Filipi alondolola ne fyebo na fimbi kabili “amubilile imbila nsuma pali Yesu,” ukwabula no kutwishika alanda na pa kubuuka kwa kwa Yesu.

Ilyo aumfwa ifi fyebo fisuma kabili ifya cine, uyu mwina Etiopia afwaya ukuba umusambi wa kwa Yesu kabili aipusha ati: “Cinshi cilendesha ukubatishiwa?” Pa numa fye ya kubatishiwa, uyu mwaume umwina Afrika aya ku mwakwe ne nsansa, kabili Baibolo tayalandapo na kabili pali wena.

Pali lelo, Inte sha kwa Yehova balafwilisha abantu abengi nga nshi mu calo conse ukumfwe “mbila nsuma” imo ine. Pali nomba, abantu amamilioni 6 balasambilila Baibolo apa fye pa mayanda yabo.