Ni pa Fya Kukuulapo Nshi Mulekuula?

UKUKOSA kwa cikuulwa kwashintilila sana pa kukosa kwa ca kukuulapo, nelyo umufula. Baibolo inshita shimo ibomfya ici cishinte mu mampalanya.

Ku ca kumwenako, kasesema Esaya, alosha kuli Yehova Lesa ngo ‘wabika ne ca kulimbapo icalo.’ (Esaya 51:13) Ici ica kulimbapo atemwa ica kukuulapo ca mampalanya cimininako amafunde ya kwa Lesa ayashaluka ayatungulula ukushinguluka kwe sonde no kulikasha. (Amalumbo 104:5) Icebo ca kwa Lesa, Baibolo, na kabili cilanda pa “fya kukuulapo” apo ubwikashi bwa bantu bwashintilila. Ifi fyaba mulinganya, amafunde, no muyano. Ilyo ifi ‘fyaomonwa,’ nelyo ukunenunwa, ku lufyengo, amafisakanwa, no lukaakala, mu bwikashi muba fye icimfulumfulu.—Amalumbo 11:2-6; Amapinda 29:4.

Ici cishinte cilabomba na ku muntu umo umo. Pa kusondolwela Ilyashi lyakwe ilyalumbuka ilya pa Lupili, Yesu Kristu atile: “Onse uumfwa no kucita ifyebo fyandi ifi, akapashanishiwa ku muntu uwashilimuka, uwakuulile ing’anda yakwe pa mwalala. Awe imfula yalilokele na mulamba aliishile ne cipuupu calipuupile no kupuma pali ilya ng’anda, lelo tayabongolweke, pantu yakuulilwe pa mwalala. Kabili onse uumfwa ifyebo fyandi ifi no kukanaficita, akapashanishiwa ku muntu umuwelewele, uwakuulile ing’anda yakwe pa musensenga. Awe imfula yalilokele na mulamba aliishile ne cipuupu calipuupile no kupama pali ilya ng’anda kabili yalibongolweke, no kuwa kwa iko kwali ukukalamba.”—Mateo 7:24-27.

Bushe ni pa ca kukuulapo nshi mulekuula ubumi bwenu? Bushe ni pa matontonkanyo ayalukayaluka aya bantunse abashipepa, ayakalenga ukuti ubumi bwenu bukabongoloke? Nelyo bushe mulekuula pa mwalala pa kumfwila ifyo Yesu Kristu asosele, ifikamwafwa ukucimfya inkuuka ya mampalanya mu bumi?