“Bapakashilwe pa Citetekelo Cabo”

MU musumba wa Cernobbio uwabela ku kapinda ka ku kuso aka Italy balibikako incende imo muli parka iya kwibukishishako bonse abafwile imfwa ya kufyengwa. Pali cimo ica fipapatu ifyaba muli cilya cifulo palembwa ishina lyaba baNarciso Riet. Aba bafyalilwe mu Germany, lelo abafyashi babo bafumine ku calo ca Italy. BaRiet bali Inte ya kwa Yehova ukutula mu myaka ya ba 1930. Mu nshita ya kuteka kwa kwa Hitler, Inte sha kwa Yehova balipakeswe pa mulandu wa kuti balikeene ukupepa Hitler ukucila Lesa wa cine, Yehova.

Lintu bakapokola baishibe ukuti baRiet baletwala bamagazini ba Ulupungu lwa kwa Kalinda mu nkambi ya kucushiwilwamo, baRiet bafyukiile ku Cernobbio. Pa nshita bali kulya balibalombele ukulapilibula Ulupungu lwa kwa Kalinda mu cina Italy pa kuti batwalileko abasumina banabo abali mupepi. Ukubombesha kwabo takwafiseme. Umukalamba we bumba lya bakapokola ilyaleitwa SS na baume ali pamo nabo basanshile no kwingila mu ng’anda ya baRiet, no kubekata, no kusakata ifya kubeshibishishako nga “bampulamafunde”—amaBaibolo yabili na makalata! BaRiet babatamfiishe ku Germany, no kuyabasungila mu nkambi ya kucushishamo abantu iyali mu Dachau, uko kwine e ko babepeye mupepi fye na ku kupwa kwa Nkondo ya Calo iyalenga Bubili. BaRiet “bapakashilwe pa citetekelo cabo,” e fyasosele ubulangisho bwa ku Cernobbio.

Icitetekelo ca baNarciso Riet na baNte bambi abengi abapakeswe mu nshita ya baNazi cifwile cilakoselesha Abena Kristu ba muli shino nshiku ukutwalilila aba citetekelo kuli Yehova, uwalinga ukupepwa Eka fye. (Ukusokolola 4:11) Yesu atile: “Ba nsansa abapakaswa pa mulandu wa bulungami.” Lesa akebukisha imilimo yabo kabili akabapaala pa kushipa kwabo.—Mateo 5:10; AbaHebere 6:10.