“Abatentemukila Kuli Bemba mu Ngalaba”

LWA mupepi ne cabu ca Gloucester, mu musumba wa Massachusetts mu calo ca U.S.A., e po baimika icipasho capangilwa ne libwe lya bronze ica mwaume uulepindulula ingalaba pali bemba apali icikuuku. Ici cipasho, calimikwa pa kuti baleibukishishako abalondo be sabi abengi aba mu Gloucester abafwilile pali bemba. Lwa mupepi na pe samba lya cipasho e po babika icipampa apo balemba amashiwi yaba pa Amalumbo 107:23, 24, apatila: “Abatentemukila kuli bemba mu ngalaba, abacito mulimo pa menshi yakalamba; bena bamone milimo ya kwa Shikulu, ne fipesha amano fyakwe pe samba lye tenga.”—King James Version.

Ca busanso nga nshi ukubombela apo bepaila isabi pali uyu bemba uwa Atlantic. Umusumba wa Gloucester pali ino nshita wakwata abantu ukucilako fye panono pali 30,000. Abalondo ukufika kuli 5,368 aba muli uyu musumba e bafwila pali bemba ilyo baaleipaya isabi. Pa cipampa balembapo no kuti: “Bamo balisendelwe ne cipuupu cikalamba na mabimbi yakalamba ayaletwa ne cikuuku icifumina pa kati ka kapinda ka ku kuso na kabanga ka bemba. Bamo balefwa beka mu tumato utunono utwalesensenunwa ukufuma ku ngalaba iyalebatungulula ku cifulo ca kwipailapo isabi. Ingalaba shimo shalepunkana ilyo kuli cipuupu kabili ku ca bulanda shalebunda, e lyo shimbi na sho baleshipunka ku ngalaba ishikalamba.”

Ici cipasho cilanga ifyo abalondo be sabi balecula, no busanso ubo balepitamo pa myaka iingi. Abantu baliloosha pa kulufya abalume babo, bashibo, bamunyinabo, na bana babo. Lelo, Yehova Lesa talaba bamunkafwilwa, abana banshiwa, nelyo balya balondo bafwilile pali bemba. Umutumwa Yohane alandile pa cikacitika ku nshita ya ku ntanshi ukuti: “Na bemba alekele abafwa abalimo, ne mfwa ne Nshiishi fyalekele abafwa abalimo.” (Ukusokolola 20:13) Lintu “abatentemukila kuli bemba mu ngalaba” bakabuushiwa bakamona “imilimo ya kwa Shikulu” iya cipesha amano.