Ukwafwa Abena China Abekala Mu Mexico

“ABANTU ikumi aba mu nko sha ndimi shonse bakekata ku cisempe ca muYuda umo, no kutila, Tuleya na imwe, pantu natuumfwo kuti muli na Lesa.” (Sekaria 8:23) Pali lelo, ubu busesemo bulefikilishiwa mu calo conse. Abantu “mu nko sha ndimi shonse” baleikata ku cisempe ca kwa Israele wa ku mupashi pa kuti balepepa Yehova Lesa. Inte sha kwa Yehova balafwaisha sana ukuti ubu busesemo bufikilishiwe. Abengi pali bena balesambilila ululimi na lumbi pa kuti balebombako uyu mulimo wa kushimikila mwi sonde lyonse.

Inte sha kwa Yehova mu Mexico na sho shilecita ifyo fine. Abena China ukufika kuli 30,000 e bekala mu Mexico. Mu 2003, abena China 15 e basangilwe ku Cibukisho ca mfwa ya kwa Kristu mu musumba wa Mexico City. Ici calengele ukuti baNte mu Mexico bamone ukuti abena China abengi kuti balunduluka ku mupashi. Pa kuti kwingaba abakushimikila ku bena China abengi, baliteyenye isukulu lya myeshi itatu ukusambilisha ba Nte abena Mexico amashiwi yayanguka aya kulanda pa kushimikila mu ciChinese. Ba Nte 25 e basangilwe kuli iyi kosi. Pa kulangisha abena China abekala mu musumba wa Mexico City ifyo ili sukulu lyacindeme, umulashi umo ukufuma muli iyo ncende, asangilwe ku kupwishishisha ukwa iyi kosi. Isukulu lya ciChinese ilyaba mu Mexico lyatumine abasambi batatu ku fyalo fimbi ukuyasambilila na fimbi mu lulimi lwa ciChinese.

Iyi kosi yabimbilemo ukulabomfya ifyo balesambilila. Abasambi batendeke ukushimikila mu ciChinese mu ncende sha makwebo isha mu musumba wa Mexico City pa numa fye ya kusambilila amashiwi yamo yamo ayaanguka. Aba basambi bacincila batendeke ukusambilila Baibolo na bantu 21. Broshuwa wa Cinshi Cintu Lesa Afwaya Kuli Ifwe? mu ciChinese icayanguka, ico beta ukuti Pinyin eyo balebomfya sana pa kusambilisha.

Balecita shani pa kutungulula amasambililo ya Baibolo pantu tapakokwele apo batendekele ukusambilila iciChinese? Ica kubalilapo, balelanda fye ukuti, “Qing Du [Belengeni mukwai]” kabili basonta pali paragrafu no kubeba ukubelenga ilipusho. Pa numa umuntu nga abelenga no kwasuka mu ciChinese, baleti, “Shei shei [Natasha mukwai] na kabili baleti, “Hen Hao [Mwacita bwino sana].”

Isambililo lya musango uyu lyalitendeke ku mwanakashi uwali Umwina Kristu uwa mwi shina fye. Pa numa ya kusambilila nankwe imiku itatu, Nte uwalemusambilisha aletwishika nga ca kuti uyu mwanakashi aleumfwikisha ifyo alesambilila. E co ulya Nte aile kwi sambililo na munyinefwe umwina China. Ilyo aipwishe ulya mwanakashi nga ca kuti ali ne lipusho ili lyonse, umwanakashi aipwishe ati: “Pa kuti mbatishiwe, bushe mfwile ukwishiba ukowa?”

Tacasendele inshita, Isambililo lya Citabo ilya pa Cilonganino lyalipangilwe na bena China 9 e lyo na baNte 23 abena Mexico. Pali abo abalesangwa pe sambililo pali na dokota umwina China, uwapokelele bamagazini ba Ulupungu lwa kwa Kalinda na Loleni! mu ciSpanish ukufuma ku mulwele aleundapa. Apo taishibe ukubelenga iciSpanish, aipwishe uwa kumupilibwilako amashiwi ayanono fye mu ciChinese. Ilyo aishibe ukuti balya bamagazini balelanda pali Baibolo, aebele uo aleundapa nga kuti amufwailako bamagazini mu ciChinese. Nkashi alimutwalile bamagazini, kabili ukupitila mwi ofesi lya musambo ilya Inte sha kwa Yehova mu Mexico, balimufwaile Nte umwina China ukuyamutandalila. Banyina ku China balikwete Baibolo, kabili uyu dokota alitemenwe sana ukuibelenga. Ilyo akuukile ku Mexico, banyina bamwebele ukuti tafwile ukuleka ukubelenga Baibolo. E ico, lyonse alepepa ukuti umo akamwafwe ukwishiba ifingi pali Lesa wa mu Baibolo. Alandile ukuti: “Lesa naumfwa ipepo lyandi!”

Na bambi abalesangwa ku kulongana kwa citabo, lupwa lwa bena China abalesonkela ing’anda ku mwanakashi umwina Mexico uwalesambilila Baibolo ne Nte sha kwa Yehova. Nangu cingatila ulu lupwa tabaleumfwa sana iciSpanish, balesangwa kwi sambililo lya citabo. Mu kupita kwa nshita ulu lupwa lwaipwishe Nte uwalebatungulula isambililo nga alikwete impapulo ishili shonse mu ciChinese. Mu kwangufyanya balitendeke ukusambilila Baibolo mu ciChinese. Tapakokwele, ulu lupwa lwalefwaisha ukulashimikila ku bena China banabo kabili balefwaya ukuipeela kuli Yehova.

Ca cine, iciChinese calyafya ukusambilila. Nga fintu mwaumfwa ku fyacitike ifyalandwapo, Yehova aleafwa abantu abengi aba ndimi ishingi mu Mexico na mu mbali shimbi ishe sonde ukusambilila ukufwaya kwakwe.

[Icikope pe bula 17]

Balesambilila iciChinese mu musumba wa Mexico City

[Icikope pe bula 18]

Nte umwina Mexico aletungulula isambililo lya Baibolo mu ciChinese

[Icikope pe bula 18]

Baleshimikila ku ng’anda ne ng’anda mu ciChinese, mu musumba wa Mexico City