Ishina lya kwa Lesa mu Nyimbo sha ku Russia

MU 1877, uwalelemba inyimbo uwaishibikwe sana ku Russia, Modest Mussorgsky alembele ulwimbo ulwalelanda pa lyashi limo ilyaba mu Baibolo. Alembele ku munankwe ukuti: “Ninemba pa muntu uwa mu Baibolo Jesus Navinus [Yoshua], nembele ukulingana ne fyo Baibolo yalanda kabili ninkonka fye ne fyo Navinus aendele pa kucimfya mu Kanaani.” Mu lwimbo na lumbi ulo alembele, ulwa kuti “Ukonaulwa kwa kwa Sankeribu,” Mussorgsky alandile pa fyaba mu Baibolo e lyo na pa bantu balumbulwa mu Baibolo.

Icacindama ca kuti, mu fyo alembele mu lwimbo lwa kuti “Jesus Navinus,” (Yoshua Navinus) e lyo no lwimbo alembele mu 1874 ulwa kuti “Ukonaulwa kwa kwa Sankeribu,” Mussorgsky alandile pali Lesa ukulingana ne fyo abena Russia bashimbula ishina lya kwa Lesa, ilyalembwa mu Amalembo ya ciHebere ukubomfya ifilembo fine ifya ciHebere—יהוה (YHWH)—kabili ili shina lisangwa mu Malembo ya ciHebere imiku nalimo 7,000.

Kanshi, inyimbo sha kwa Mussorgsky shilango kuti ishina lya kwa Lesa ilya mu Baibolo—Yehova—ni kale sana lyaishibikwe ku bantu ba ku Russia ninshi ne myaka ya ba 1900 tailafika. Ici kuti cabe fyo pantu Yehova umwine aebele Mose ukuti: “Ili e shina lyandi umuyayaya, kabili ici e ciibukisho candi ku nkulo ne nkulo.”—Ukufuma 3:15.

[Icikope pe bula 32]

Laibrare ya St. Petersburg Conservatory mu 1913, umo basungila inyimbo shalembele Mussorgsky

[Abatusuminishe Ukubomfya Icikope pe bula 32]

Ulwimbo: The Scientific Music Library of the Saint-Petersburg State Conservatory named after N.A. Rimsky-Korsakov; icikuulwa: National Library of Russia, St. Petersburg