Balitontonkenye Bwino Sana

ABALUMENDO batatu abekala mu Central Africa balefwaya ukuyasangwa ku kulongana kwa citungu. Bali no kwenda shani pa kuyafika ukwa kulonganina? Ukufuma apo baleikala ukufika ku cifulo ukwalebela ukulongana pali amakilomita nalimo 90. Umusebo bali no kupitamo walibipile kabili wali no lukungu, e lyo tabakwete motoka nelyo incinga iyo bengabomfya. Balefwaya ukwashima incinga shitatu lelo tabasangile incinga ishali bwino.

Ilyo eluda wa mu cilonganino bali amwene ubwafya bakwete, alibashime incinga yakwe iya kale, lelo ukwenda kwena yaleenda. Uyu eluda aebele aba balumendo ifyo ena na banankwe balecita pa kusangwa ku kulongana kwa citungu. Abebele ukutila bonse batatu bakabomfyeko incinga. Ico abebele ukucita calyangwike, lelo pa kuti bonse batatu babomfyeko incinga balekabila ukupekanya bwino. Bushe abantu batatu kuti babomfya shani incinga imo pa lwendo?

Pa kuti bepya ku kasuba, aba balumendo bakumene ulucelo sana no kukakila ifipe fyabo pa ncinga. Uwa kubalilapo aninine pa ncinga no kuya, lelo abanankwe babili bamukonkele pa numa baleenda fye. Ilyo acofele ukufika apataliko, aileiminina no kushintilisha incinga ku cimuti apo abanankwe baleimona pa kuti abapuupu tabebile. Lyena atwalilile ukwenda.

Lintu balya babili abashele ku numa bafikile apali incinga, umo aliibulile no kuninapo, umubiye ena atwalilile ukwenda pa makasa. Apo balipekenye bwino kabili bali no mupampamina, bonse batatu balibomfesheko incinga ica kuti nga kwenda fye na makasa nga baendele amakilomita 90, nomba apo balenina na pa ncinga, ici calengele ukuti bende fye pa makasa amakilomita 60. Kanshi ifyo bapekenye ukucita fyalibafwile sana. Balitemenwe nga nshi ukusangwa pamo na Bena Kristu banabo kabili baliipakishe ukulongana kwa citungu. (Amala. 31:12) Bushe uno mwaka mukaipekanya bwino sana pa kuti mukasangwe ku kulongana kwa citungu?