BUSHE KUTI MWA-ASUKA ICI CIPUSHO?

Bushe calolele mwi filya aba ku kale balelepula ifya kufwala fyabo?

BAIBOLO yalilondolola ifintu ifingi ifyalelenga abantu bamo ukulepula ifya kufwala fyabo. Muno nshiku, abantu nga babelenga pali ifi aba ku kale balecita, te kuti beluke icalelenga balecita ifi. Lelo ku ba Yuda, cali cishibilo ca kutila umuntu naumfwa sana ububi pa cicitike, na kalipa, ali no bulanda, nelyo aleloosha.

Ku ca kumwenako, Rubene ‘alilepwile ifya kufwala fyakwe’ ilyo asangile ukuti bamunyina nabashitisha Yosefe umwaice wakwe uo alefwaya ukupususha. Yakobo shibo ‘alilepwile ica kufwala cakwe’ ilyo amwene kwati Yosefe nabamulya ku ciswango. (Ukute. 37:18-35) Yobo ‘alilepwile ica kufwala cakwe’ ilyo bamwebele ukuti abana bakwe bonse nabafwa. (Yobo 1:18-20) Inkombe imo yaishile ne ‘fya kufwala ifyalepulwa’ ilyo yaishile mukweba Shimapepo Mukalamba Eli ukuti abena Israele nababacimfya mu bulwi, na bana bakwe abaume babili nababepaya, ne cipao ca cipangano nabacisenda. (1 Sam. 4:12-17) Ilyo Yoshia aumfwile amashiwi bamubelengele mwi buuku lya Mafunde, aishiba no kuti ena na bantu bakwe balibembwike, ‘alepwile ifya kufwala fyakwe.’—2 Isha. 22:8-13.

Ilyo Yesu balemulubulwisha, Shimapepo Mukalamba Kayafa “alepwile ifya kufwala fyakwe” ilyo aumfwile ifyo Yesu alandile ifyo amwene ukuti miponto. (Mat. 26:59-66) Bakafundisha aba Yuda bafumishe ifunde lya kuti umuntu nga aumfwa ishina lya kwa Lesa lyasaalulwa, alingile ukulepula ica kufwala cakwe. Lelo pa numa ya konaulwa kwe tempele lya mu Yerusalemu, aba bakafundisha batile “pali ino nshita umuntu nga umfwa uko umo alepontela ishina lya kwa Lesa talingile ukulepula ifya kufwala fyakwe, pantu ifya kufwala fyakwe fyonse kuti fyapwa ku kulepuka.”

Kwena ukulepula ica kufwala takwacindeme kuli Lesa nga ca kutila umuntu uwacita ifyo ali no bumbimunda, tali no bulanda bwa cine cine. E co Yehova aebeele abantu bakwe ukuti: “Lepuleni imitima yenu, mwilepula ifya kufwala iyo; bweleleni kuli Yehova.”—Yoele 2:13.