Ifyabipa Nafifula!

Ba Smita,aabaali ne myaka 35 baleikala mu Dhaka, mu calo ca Bangladesh, baishibikwe ukuti baali aba cikuuku kabili balitemenwe abantu. Nangu ca kuti ba Smita e lyo baupilwe fye, balebombesha kabili balefwaisha ukwafwa abantu ukwishiba ifyo basambilile pali Lesa. Balupwa wabo ne fibusa balipapile nga nshi ilyo ba Smita balwele ubulwele ubwabepeye ilyo papitile fye inshiku shinono.

Ba James na bena mwabo abaali nalimo ne myaka 35 abashakokwele mu cupo, nabo bene baali aba cikuuku kabili balitemenwe na bantu nga filya fine ba Smita baali. Ba James na bena mwabo baile mu kutandalila ifibusa fyabo ku masamba ya United States. Ku ca bulanda tababwelele ku New York uko baleikala pantu balisangilwe mu busanso bwabipisha ubwa pa musebo. Ne ci calengele ukuti balupwa wabo na bo balebomba nabo bekatwe ubulanda nga nshi.

Muno nshiku ububifi no kucula fili fye mpanga yonse. Abantu e lyo na bashilika balafwa mu nkondo. Abantu abakaele balacula pa mulandu wa misoka no lukaakala. Abantu balalwala no kufwa ku masanso yabipisha te mulandu no mushinku nelyo ifyo baishibikwa mu bwikashi. Amasanso yalepaya abantu ukwabula ukusalulula. Ulupato no lufyengo fyaba fye mpanga yonse. Nalimo na imwe mwaliculapo kuli ifi tulumbwile.

Kanshi kuti twaipusha ifipusho pamo nge fi:

• Mulandu nshi ifyabipa ficitikila abantu abacita ifisuma?

• Bushe Lesa e ulenga ukuti ifyabipa filecitika?

• Bushe ifyabipa ficitika fye nelyo bantu balenga?

• Ukulingana ne cisambilisho ca Karma icitila umuntu alacula pa mulandu wa fyo alecita kale, bushe e cilenga ukuti abantu balecula?

• Nga ca kuti kwaliba Lesa wa maka yonse, mulandu nshi ashicingilila abantu abacita ifisuma ku fyabipa?

• Bushe ifyabipa no kucula fikatala afipwa?

Pa kusanga ifyasuko kuli ifi fipusho, tulingile intanshi ukwishiba ifyasuko kuli aya mepusho yabili ayakonkapo: Mulandu nshi ifyabipa ficitikila, kabili finshi Lesa akacitapo?