Nalisambilile Ukuti Yehova wa Luse Kabili Aleleela

INKULILO YANDI:

Nakuliile mu musumba wa Montreal, incende umwali sana abantu abalecula. Ilyo nali ne myeshi 6, batata balifwile, twashele fye na bamayo kabili e baletusakamana muli fyonse ifyo twalekabila. Mu lupwa lwesu twali abana 8 kabili nine kasuli.

Ilyo nalekula, nalitemenwe sana ukubomfya imiti ikola, ukuteya ifyangalo fya kushitikapo, e lyo naleyangala na batemenwe ulukakaala. Ilyo nali ne myaka 10, natendeke ukubombelako bacilende utumilimo tumo tumo kabili nalekongwesha na bantu kaloba. Nalitemenwe ukubepa no kulaibila abantu mu bucenjeshi. Nalikunkwime!

Ilyo nali ne myaka 14, nalicililemo ukwibila abantu. Ku ca kumwenako, naleshita inkoloko ishingi isha golde, amakoosa ne nindaminwe, kabili nalefiyemfya sana e lyo nafishitisha pa mutengo uo baleshitishishapo ifyo bapanga na golde iya cine cine. Naleshitishisha ku ncende ukwalesangwa sana abantu. Nalitemenwe sana ukupanga indalama mu bucenjeshi. Bushiku bumo, nalipangile indalama ishingi ishafikile amadola 10,000 (K63,000)!

Ilyo nali ne myaka 15, balintamfishe ku sukulu uko basambilisha bantalamisoka ifya kuleka imibele yabipa. Nshakwete ukwa kwikala, e co nalelaala mu misebo, mu ma parka nelyo ku banandi.

Ilingi line bakapokola balenjita ku kundubulwisha, pantu nalitemenwe sana ubucenjeshi. Apo nshaleshitisha ifya kwiba, tabankakilepo mu cifungo. Na lyo line, balendipilisha sana indalama pa mulandu wa bucenjeshi e lyo na pa kulashitisha ifintu ukwabula insambu. Nshaletiina umuntu uuli onse, nangu ni pa kupokelako bambi indalama balekongwesha pali kaloba. Ifyo nalecita tafyali bwino kabili inshita shimo nalesenda ne mfuti, e lyo limo limo nalebomba no tubungwe twa fipondo.

IFYO BAIBOLO YAYALWILE UBUMI BWANDI:

Umuku wa kubalipo uo naumfwilepo abantu balelanda pali Baibolo ni lintu nali ne myaka 17. Naleikala no mwanakashi uo nale-enda nankwe, kabili atendeke ukusambilila Baibolo ne Nte sha kwa Yehova. Nshatemenwe ilyo namwene ukuti atendeka ukukonka ifyo alesambilila pa mibele iisuma, ne ci calengele imushe no kuya mu kwikala no mwanakashi uo nalepanga ukuupa.

Ifintu fyalyalwike ilyo umukashana naleikala nankwe kabili uo nalefwaya ukuupa na o atendeke ukusambilila Baibolo ne Nte sha kwa Yehova. Nalitemenwe ifyo uyu umwanakashi ayalwike pantu alitendeke ukuba uwafuuka no kuba uwatekanya. Bushiku bumo nalisumiine ukuya mu kulongana ku Ng’anda ya Bufumu iya Nte sha kwa Yehova. Ba Nte balimpokelele bwino sana e lyo baali aba mucinshi kabili abacileela. Aba bantu balipuseneko ku bantu bambi! Balupwa lwandi tabalemfwaya, kabili ukutula fye ku bwaice, nalimwene ukuti tabantemenwe. Filya ba Nte balangile ukuti balintemwa, e fyo nalefwaya ukufuma fye na ku kale, e co nalisumiine ukusambilila Baibolo.

Ifyo nalesambilila muli Baibolo fyalingafwile sana. Ine na banandi babili twalipangene ukuti tukaye mu kwiba pa kuti nkalipile inkongole nakwete ishali amadola 50,000 (K315,000). Lelo caliweme ukuti nshaileko! Abanandi babili bena balile kabili umo balimukakile e lyo umbi balimwipeye.

llyo natwalilile ukusambilila Baibolo, namwene ukuti nalingile ukwaluka mu fintu ifingi. Ku ca kumwenako, nalisambilile ifyo Baibolo ilanda pali 1 Abena Korinti 6:10 apatila: “Abapuupu, nangu bafunushi, nangu ni bacakolwa, nangu abatukana, nangu ni balya abacenjesha abanabo, tabakapyane Ubufumu bwa kwa Lesa.” Ilyo nabelengele ili ilembo, nalitontonkenye pa fyabipa ifyo nalecita kabili nalilukwishe ifilamba. Nalimwene ukuti nalingile ukuleka ifyabipa fyonse ifyo nalecita. (Abena Roma 12:2) Nali uwa lubuli kabili umukali e lyo nali uwa bufi sana.

Na lyo line, nalisambilile muli Baibolo no kuti Yehova wa luse kabili aleleela. (Esaya 1:18) Nalepepa sana kabili nalepaapaata Yehova ukuti angafwe ukuleka ifyabipa ifyo nalecita. Yehova alingafwile ukuleka ukucita ifyabipa panono panono. Icacindama ico ine no mwanakashi naleikala nankwe twacitile, kulembesha icupo cesu mwi funde.

Nali ne myaka 24 kabili twakwete abana batatu. Nalingile ukufwaya incito iisuma, iishili ya kwibila abantu, lelo nshasambilile sana kabili nshakwete na mapepala ya kwingililapo incito. Na kabili nalipepele sana kuli Yehova e lyo naya mu kufwaya incito. Nale-eba abo nalefwayako incito ukuti nalefwaya ukwalula imibele yandi kabili ne ncito nalefwaya ya kubomba na bucishinka. Inshita shimo nalebalondolwela no kuti nalesambilila Baibolo kabili nalefwaisha ukuba umuntu umusuma. Abengi abo naleya mu kufwayako incito balekaana. Bushiku bumo ilyo naile mu kufwaya incito, nalilondolwelele abo nalefwaya ukwingilako incito pa fyo imibele yandi yali kale. Ilyo nabebele, banjebele abati: “Nshishibe ifyo ningalanda, lelo cimo cilenjeba ukuti mfwile fye ukukwingisha incito.” Nalishininkishe ukuti Lesa alyaswike amapepo yandi. Mu kuya kwa nshita, ine no mwina mwandi twalibatishiwe, twaba Inte sha kwa Yehova.

IFYO NANONKELAMO:

Icalenga ukuti imbe no mweo na ino nshita ni co ndakonka ifyo Baibolo isambilisha kabili nshicita ifyabipa. Nalikwata ulupwa ulusuma. Apo nalishininkisha ukuti Yehova alinjelela, naliba na kampingu iisuma.

Napapita imyaka 14 ukutula apo natendekeele umulimo wa kusambilisha abantu Baibolo uwa kubomba ama-awala 70 cila mweshi, kabili umwina mwandi na o alitendeka ukubomba uyu umulimo. Pa myaka ukucila pali 30 iyapita, naliba ne nsansa pantu nalyafwa abo momba nabo 22, ukuba Inte sha kwa Yehova. Ncili ndaya mu fifulo umusangwa abantu abengi, lelo pali ino nshita nshiya mu kubebila nga filya nalecita kale, lelo nja mu kubebako ifyo nasumina. Mfwaya ukubebako pe subilo twakwata ilya kwikala mu calo cipya umushakabe incenjeshi.—Amalumbo 37:10, 11.