Ubupe Ubwacila pa fya Bupe Fyonse

AKAKUSONGWELAKO pensulo ako ba Jordan babapeele ilyo bali abaice takalemoneka ukuti kasuma. Na lyo line, aka akakusongwelako kaba pa fintu ifyo bacindamika sana. Ba Jordan balandile ukuti: “Ba Russell abaali bacibusa wesu e bampeele aka akakusongwelako ninshi ndi fye umwaice.” Ilyo ba Russell bafwile, e lyo ba Jordan baishibe ifyo baleyafwilisha abafyashi na bashikulu babo ilyo baleba na mafya. Ba Jordan batile: “Apo nomba nalishiba ifingi pali ba Russell, aka akakusongwelako bampeele nomba nalikacindamika sana.”

Nga filya cali kuli ba Jordan, abantu bamo nalimo te kuti bamone ifyo ica bupe babapeele cacindama. Na lyo line, ku muntu uutasha, ubo ubupe kuti bwaba ubwacindama sana kuli ena. Baibolo yalilanda pa bupe ubwacindamisha pali ili ilembo ilyaishibikwa sana ilitila: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:16.

Ici ica bupe kuti calenga umuntu aba no mweo wa muyayaya! Bushe kuti kwaba ica bupe icingacindama ukucila ici? Nangu ca kuti abantu bamo te kuti bamone ubucindami bwa ici ica bupe, Abena Kristu ba cine bena balicindika sana ici ica bupe ca “mutengo.” (Amalumbo 49:8; 1 Petro 1:18, 19) Nomba, cinshi calengele Lesa apeele ubumi bwa Mwana wakwe ku bantu pano calo?

Umutumwa Paulo alilondolwele ico Lesa acitiile ifi ilyo alembele ati: “Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse.” (Abena Roma 5:12) Umuntu wa kubalilapo Adamu, alibembukiile Lesa ku mufulo kabili ici calengele ukuti afwe. Kanshi Adamu e walenga ukuti abantu bonse balefwa.

“Icilambu ca lubembu ni mfwa, lelo ubupe bwa kwa Lesa mweo wa muyayaya muli Kristu Yesu Shikulwifwe.” (Abena Roma 6:23) Pa kuti abantu balubulwe ku mfwa, Lesa atumine Umwana wakwe Yesu Kristu pano calo ku kutuula ubumi bwakwe ubwapwililika. E ico abantu bonse abacetekela Yesu bakakwata umweo wa muyayaya ukupitila mwi lambo apeele iliitwa ukuti “icilubula.”—Abena Roma 3:24.

Paulo alandile pa mapaalo yonse ayo Lesa apeela bonse abamupepa ukupitila muli Yesu Kristu, ukuti: “Ala natuletasha Lesa pa bupe bwakwe ubushaikulila.” (2 Abena Korinti 9:15) Tatukwata na mashiwi ya kulondolola ifyo tutasha pa cilubula pantu calicindama nga nshi. Nomba cinshi icilubula cacindamina ukucila ifya bupe fyonse ifisuma ifyo Lesa atupeela? Capusana shani ne fya bupe fimbi ifyo Lesa atupeela?a Kuti twalanga shani ukuti tulatasha pa cilubula ico Lesa atupeela? Belengeni ifyo Baibolo yayasuka aya amepusho mu fipande fibili ifikonkelepo.