Mwilalolesha Fye Ifyo Umuntu Amoneka ku Nse!

BA DON, ba Nte abekala ku Canada balitemwa ukubila imbila nsuma ku bantu abekala mu musebo. Ba Don bashimike pali umo uwaleikala mu musebo abati: “Nshabalile monapo umwaume uwikala mu musebo uwalambile nga ba Peter. Ba Peter tabalemoneka bwino, kabili balishibe sana ifya kucita pa kuti abantu belalanda nabo. Pa miku iingi tabalefwaya ukuti abantu babafwe.” Na lyo line, pa myaka ukucila pali 14 ba Don tabalekele ukuba ne cikuuku pa kuti bafwe uyu mwaume uushakwete umwakwikala.

Bushiku bumo ba Peter baipwishe ba Don abati: “Finshi mufwaya kuli ine? Abantu bonse bantamba fye. Cinshi mwambikilako amano?” Ba Don balilanshenye amalembo yatatu na ba Peter pa kuti babafike pa mutima. Ba Don babalilepo ukwipusha ba Peter nga ca kuti balishibe ishina lya kwa Lesa kabili babebele ukubelenga ili ishina mu Baibolo pa Amalumbo 83:18. Lyena pa kulanga ba Peter ico bababikiileko amano, babebele ukubelenga Abena Roma 10:13, 14 apatila “onse uwalilila kwi shina lya kwa Yehova akapusuka.” Na mu kulekelesha ba Don babelengele Mateo 9:36 pa numa baebele ba Peter ukuibelengela abene. Ili ilembo litila: “Ilyo amwene amabumba, abomfwilile uluse pantu balebacusha kabili bali abapaswa nge mpaanga ishabula kacema.” Ilyo ba Peter bapwishishe fye ukubelenga, ifilamba fyalitengelele mu menso kabili baipwishe ba Don abati: “Bushe na ine naba pali ishi impaanga?”

Ba Peter balitampile ukwaluka. Balitendeke ukusamba, balibeyele umwefu, kabili balitampile no kufwala ifya kufwala ifisuma ifyo ba Don babapeele. Ba Peter balitwalilile ukumoneka bwino.

Ba Peter balikwete akatabo ako balelembamo ifyalebacitikila. Ifyo babalilepo ukulembamo fyalelanga ukuti tabali ne nsansa kabili tabakwete isubilo, lelo ifyo balembele pa kulekelesha fyalipuseneko. Fimo ifyo balembele fyaleti: “Lelo nacisambilila ishina lya kwa Lesa. Nomba nga napepa nakulapepa kuli Yehova. Nintemwa ukuti ninjishiba ishina lyakwe. Ba Don bacinjeba abati Yehova kuti aba Cibusa wandi, inshita iili yonse kuti nalanda nankwe kabili kuti akutika fyonse ifyo ningamweba.”

Amashiwi ayo ba Peter balekelesheko ukulemba, balembeele abana banabo. Batile:

“Nshileumfwa bwino lelo. Nalimo bukote bulengele. Nangu nafwa lelo, ninjishiba ukuti tukamonana na cibusa wandi [Don] na kabili mu Paradaise. Nga ca kuti mulebelenga aya amashiwi, ninshi nimfwa. Lelo nga ca kuti mwamona umwaume uo mushishibe pa cililo candi, mukalande nankwe kabili mukabelenge aka akatabo ka bluu [Alelanda pa katabo akatila “Icine Icitungulula ku Bumi bwa Ciyayaya” ako bamupeele kale].a Aka akatabo kalanda ukuti nkamona cibusa wandi na kabili mu Paradaise. Nalishininkisha ukuti ifi fikacitika. Nine munyinenwe Peter.”

Ilyo icililo capwile, ba Ummi bankashi ya ba Peter batile: “Napapita imyaka ibili ukutula apo ba Peter balandile na ine. Pa myaka iingi, uyu e wali umuku wa kubalilapo uo bamoneke ukuti bali ne nsansa. No kumwentula balimwentwile.” Ba Ummi baebele ba Don abati: “Nkabelenga aka akatabo pantu icingafika ndume yandi pa mutima, ninshi cisuma sana.” Ba Ummi nabo balisumiine ukusambilila mu citabo icitila Bushe Cinshi Baibolo Isambilisha? na Inte ya kwa Yehova.

Na ifwe bene tatulingile ukulalolesha fye ifyo abantu bamoneka, lelo tufwile ukutemwa abantu ba misango yonse no kubatekanishisha. (1 Tim. 2:3, 4) Nga tulecita ifi, tukafwa abantu abashimoneka bwino ku nse lelo ababa no mutima uusuma nga fintu ba Peter bali. Ukwabula no kutwishika, Lesa ‘uumona mu mutima,’ akamesha icine mu mitima ya bantu abafwaya ukwishiba icine.—1 Sam. 16:7; Yoh. 6:44.