Bushe Mulelobolola Amapaalo?

(4 min.) Umulimi uukonka ififwaikwa fyayanguka alenekela ukulobolola ifingi. (Luk. Mil. 11:4, 6; 2 Kor. 9:6) Lelo, abalimi balacenjela sana ukukanaonaule mbuto pa kulatanda na po beshibe ati tashakamene. E fyo na ifwe tufwile no kuba abashilimuka ilyo tuleshalika impapulo shesu mwi bala. Tufwaisha ukusha impapulo ku balefwaya ukusambilila icine cine. Tufwaya abayana ukuba ne shuko lya kusambilila icikuuku ca bupe fye ica kwa Yehova ne subilo lya Bufumu. Kuti twaba shani aba mano kabili abashilimuka muli ci?

(3 min.) Kangalila wa mulimo akakomaila pa kukabila kwa kupekanya pa kuti tuletambika impapulo no kupokelela ubupe mu nshila yalinga kabili iyabamo kushilimuka. Koselesheni icilonganino ukupooseshako amano ku filangililo fyakonkapo fitatu no kulemba ifyebo.

(5 min.) Kasabankanya nelyo painiya atambika icitabo ca Ukwishiba ku muntu uulefwaisha nga nshi ukusambilila icine. Kasabankanya atila: “Inte sha kwa Yehova babomba mu kuitemenwa pantu baishiba ukuti calicindama ukuti abatiina Lesa bomfwe iyi mbila nsuma. Ubupe bwa kuitemenwa ubwa Nte sha kwa Yehova na bantu bambi abakatamika amasomo ya Baibolo pali lelo e bulenga ukuti uyu mulimo ulebombwa no kuti tuleshalika ici citabo ukwabula ukulipilisha ku bantu abalefwaya ukusambilila icine cine pa kuti beshibe ico Lesa alaya abantunse.” Mwine ng’anda aipusha ati: “Bushe mwalanshila ici citabo?” Kasabankanya pa kwasuka atila: “Ee nalamushila, kulila fye mulefwaya ukwishiba ubukombe bwa mu Baibolo ubuli muli cene. Kuti natemwa ukubwela kabili no kulanshanya na imwe pali ifi fyebo na fimbi. Nga mulefwaya ukusangwilako kuli uyu mulimo wa masomo ya Baibolo, mukwai kuti mwacite fyo. Twalatasha nga nshi ubupe bwenu kabili buli no kubomfiwa fye ku kulundulula imbila nsuma iya Bufumu.” Mwine ng’anda afumya indalama kabili kasabankanya amweba ukubika muli enifulupu uwalembwapo ukuti imisangulo ya mulimo wa mwi sonde lyonse.

(5 min.) Bomfyeni icilangililo cimo cine ku kulanga ifyo kasabankanya engashalika icitabo ca Ukwishiba, ukupeela icitabo kuli mwine ng’anda ukuti ekate mu minwe, e lyo nomba ukumwipusha nga kuti atemwa ukusangwilako ku mulimo wa mwi sonde lyonse. Uno muku mwine ng’anda atila, “Kwena kwati nshakabelenge ici citabo.” Kasabankanya apoke citabo kuli mwine ng’anda no kutila: “Nalatwala ici citabo kuli umbi uwingaipakisha ukucibelenga. Napamo pali ino nshita, kuti mwatemwa ukubelengako trakti uyu.”

(3 min.) Kasabankanya nelyo painiya alangilila ifya kutambika bamagazini ba nomba line. “Mwashibukeni mukwai. Ishina lyandi nine______. Namuletelako ifyebo fyacindama nga nshi pa lwa [landeni umutwe wa lyashi]. Natemenwe sana ici cishinka. [Langeni icishinka ca kulungatika nelyo londololeni icikope.] Calingafwile [shimikeni ifyo mwanonkelamo], kabili ndemona kwati na imwe mukaipakisha ukubelenga cene. Nga muli no kubelenga magazini, kuti natemwa ukumushila.” Mwine ng’anda aipusha ukuti, “Ni shinga aba bene bamagazini?” Kasabankanya nelyo painiya ayasuka ati, “Tatushitisha impapulo shesu, lelo nga mulefwaya ukusangwilako ku mulimo wa kusambilisha Baibolo uwa mwi sonde lyonse, tulatemwa ukupokelela ubupe bwa musango yo.” Mwine ng’anda afumya indalama kabili kasabankanya nelyo painiya amweba ukubika muli enifulupu uwalembwapo ukuti imisangulo ya mulimo wa mwi sonde lyonse.

(5 min.) Kangalila wa mulimo acinkulako bakasabankanya ukubomfya bwino impapulo no kulondolola inshila ya kushalikilamo impapulo ukwabula ukulipilisha mu kushilimuka ku balefwaya ukwishiba icine kabili abapokako impapulo. Pa kuti impapulo shesu shibe isha kwafwa sana, shifwile ukushalikwa ku balesapike cine, e kutila, abafwaya sana ukwishiba ubukombe bwesu no mulimo tubomba. Ilingi line ici kuti caishibikwa ilyo twatandala fye umuku wa kubalilapo. Bakasabankanya tabafwile ukushimunuka ukushalika impapulo. (Mat. 10:11) Lelo, tatufwile kulapeelaika fye impapulo kuli balya abashilemoneka ukuti balatasha ubukombe bwesu ubwa Baibolo. Ico twayangwa sana kusanga no kuliisha impaanga sha kwa Shikulu no kushafwa ukuipangasha pa kuti shikapusuke no kwingila mu calo cipya ica kwa Yehova.

Tatufwile ukushimunuka ku kutande mbuto sha Bufumu pa mulandu wa kuti tuletiina ukweba abantu uko indalama shibomfiwa mu mulimo wesu shifuma. Lelo, tufwile ukuba abashilimuka pa kuti impapulo shesu tashileponena pa ‘mushili wa nsakalabwe’ no konaika. (Marko 4:5, 6, 16, 17) Abakatamika imbila nsuma iyo tubilisha balaba aba nsansa ukusangwilako.—Linganyeniko Mateo 10:42.