Ibungano lya Citungu Ilya “Akatiina ka Bukapepa” Ilya 1994 Ilya Nte sha kwa Yehova
1 Ukulumbulula kwa kufuma ku mutima ukwa kutasha pali programu wa kupembesula lwa ku mupashi kwalyumfwike ukufuma ku bengi aba muli 317,357 abasangilwe ku Mabungano ya Citungu aya “Ukusambilisha kwa Bulesa” aya 1993 mu cifulo ca musambo wa Zambia. Abapya ababatishiwe pamo nge ca kufumamo mu kupeela kwabo ukusakamana ku kusambilisha kwa bulesa ukusangwa muli Baibolo baali impendwa bonse pamo 1,975. Ukuipakisha kwesu programu wa musango yo uwa kukuulilila umwaka wapwa kulingile mu cine cine ukutucincisha ukucito kubombesha ukuli konse ukusangwa kuli programu wa kubimbula uuletantikilwa kwi Bungano lya Citungu Ilya “Akatiina ka Bukapepa” ilya 1994 ulusuba luleisa. Mu kuba ne mpika shifulishe fi ishilolenkene no mutundu wa muntu ilelo, mu kushininkisha ifwe bonse tukalaalikako no kwesha ukutantikila abasambi besu aba Baibolo ukuba kulya pamo na ifwe. Cikaba ni ntulo ya cine cine iya kukoselesha no bukose ilintu tuletwalilila ukubombela Yehova mu kuba na katiina ka bukapepa te mulandu ne fipindami ifili fyonse ifingesako mu nshiku shili pa ntanshi.
2 Shininkisha ukucita ukutantika kobe ukwe bungano mu kusakamanishisha kabili mu kubamo ipepo pa kuti wingaba kulya ku kuipakisha inshiku shonse shitatu isha programu wa ku mupashi uwa kulengo buseko, ukufuma ku lwimbo lwa kwiswila ukufika kwi pepo lya kwisalila. Mu kutemwa sansha mu mapange yobe abo pambi abengakabila ukwaafwa, ukucilisha abapya abalesekelela, pa kuti na bo bene bengasangwa ku ciputulwa ca kulongana cimo na cimo. Kuti caba ica kwaafwa nga nshi ukulanguluka ifyebo fili muli ici ca mu kati na basambi ba Baibolo abali bonse abo pambi balepanga ukusangwako. (Gal. 6:10) Programu akatendeka mu kuba ne nyimbo pa 9:20 a.m. pa kasuba ka kubalilapo no kupwa mupepi na pa 4:00 p.m. Pa kasuba ka cibili programu akatendeka pa 9:00 a.m. no kupwa mu kuba no lwimbo ne pepo mupepi na pa 4:30 p.m. Iciputulwa ca kulongana kwa lucelo ica pa kasuba ka kulekelesha cikatendeka pa 9:30, kabili programu wa kalya kasuba akasondwelela mupepi na pa 4:15 p.m. Ifyebo fyakonkapo fikakwaafwa mu mapekanyo yenu aya kutendekelako.
3 Ukucingilila Umulilo na Masanso Yambi: Ukwabulo kutwishika, icikalamba icilenga umulilo pa mabungano, tacaba kwipikila ifya kulya mupepi ne misakuta, lelo bana abashangalilwa bwino abangasha umulilo nelyo abekala ku mulilo. E ico, ku kucingililwa kwenu no ko ukwa bamunyinenwe, mwilasuminisha abana benu ukwendauka ukwabula ukusakamanwa; mwilashiila abana ukusakamana amenshi yalebilauka, nelyo mu nshila imbi ukusakamana umulilo wa kwipikila. Kuti pambi bakwata amaka ya kucite fi fintu bwino ku ŋanda, lelo icifulo ce bungano cintu capusanako kabili ukusakamana kwaibela kulingile ukubuulwa pa kusengauka amasanso ukucitika. Abantu abengi bekala capamo mu kupalamisha, kabili abana batemwa ukwangala ifyangalo lintu bali na baice banabo. Balapumbulwa mu kwanguka kabili tabamwena libela ubusanso, kabili pali iyi milandu tatulingile ukubashingamika kandulo, macisa nelyo inyali. Impika na imbi ilemako lintu abafyashi baya ku kulongana mu kasuba no kusha abana banono mu misakuta ukwabulo kusakamanwa. Abana balingile ukwikala na bafyashi babo mu kati ka programu. Lintu bakapyunga bamona abana baleendauka mu cifulo ce bungano ukwabulo kusakamanwa, kuti batungulula abana ukubwelela ku bafyashi babo. Mwe bafyashi! twapaapaata bombeleni pamo na bakabomba ba pe bungano kabili muli iyi nshila langilileni “[ukutemwa] aba bwananyina.”—1 Pet. 2:17.
4 Ukuteyanya kwa kwa Yehova mu kubamo kutemwa kulapayanya ifya kucinkulako ifyalingana ne nshita mu kulundana na mabungano. Ca bulanda ukusosa ukuti pa mabungano yafulilako umwaka wapwile, abalesangwa kwi bungano bamo balilufishe ifipe fyabo ukupitila mu mulilo uyo wali no kusengaukwa. Abo bamunyina abashingamwa pa mabungano kabili ukucilisha abafyashi, baleipushiwa ukupeelako ukusakamana kwaibela kuli ifi fishinka fyacindama pa kuti amabungano yesu yakafumemo ukubishanya kwa kukuulilila kabili ukusuma, kabili tayakendele pamo no bulanda ne nkumbabulili pa mulandu wa mulekelesha ufumamo amasanso.
5 Ukutantika kwa Mayanda: Ilingi line bamunyina bapanga amapekanyo yabo abene ukwikala na bantu babo nelyo ifibusa mu misumba ya mabungano. Mu ncende sha mu mishi, bamunyina bakuula imisakuta nelyo balaala mu fiyanda fikalamba ifipekanishiwa na bakabomba ba kuitemenwa abe bungano. Amabungano yanono yabomfya amayanda ya kulaalamo abana ba masukulu pa kuti bengapayanishisha umwa kusendama bonse abalesangwako. Lintu bapayanishiwilwa umwa kusendama na bamunyina nelyo abantu babo, tacili icalinga ku makombe ukushukila mu kukanalangulukilako icileela ca bamunyinefwe pa kwenekela ukupayanishiwilwa umwa kusendama inshiku shafulilako pa kuti bengatuusha pa numa ye bungano. Iyi miputule ya ciputulwa ca nshita ice bungano epela. Abo abapokelela umwa kusendama mwa musango yo balingile ukumona ukuti bene na bana babo baikala mu mucinshi mu ŋanda ya kwa shibweni wabo no kukanaonaula icili conse nelyo ukusakawila mu fipe nelyo incende sha pa mbali isha mu ŋanda. Nga ca kuti abene mayanda bakumanya ubwafya ubuli bonse ukulola kuli ifi fyatubululwa, ifi filingile ukuletwa ku kusakamana kwa Dipartimenti ya Mayanda mu kwangufyanya pe bungano, kabili bamunyina kulya bakaba aba nsansa ukwaafwa.
6 Ukukabila Kwaibela: Uku kupayanya kwa bakasabankanya ba ca kumwenako cisuma epela, ukusanshako na bana babo aba mibele isuma, abasuminishiwa na Komiti ya Mulimo iya Cilonganino. Imitantikile ku kusakamana abantu abakwata ukukabila kwaibela ilingile ukucitwa ne cilonganino uko basangwa ukucila ukuti uku kukakililwako kubikwe pa kuteyanya kwe bungano. Baeluda na bambi abali abaibukila pa lwa mibele ya muntu umo umo kuti mu kubamo kutemwa batambulula ukwaafwa. Ici ilingi line cifwaya ukuti bakasabankanya balanguluke ukukabila kwa abo baba mu mulimo wa nshita yonse, abakoloci, abalwalilila, kabili nakalimo na bambi. Bakasabankanya kuti pambi batambulula ukwaafwa pa kusendako aba musango yo nelyo ukusakamana ukukabila kwabo mu nshila shimbi.—Yako. 2:15-17; 1 Yoh. 3:17, 18.
7 Abo abakwata ukukabila kwaibela TABALINGILE ukuya kwi bungano no kwipusha umwa kusendama lintu bafika, pantu Dipartimenti ya Mayanda ifwile ukukwata ukwebekesha ukufuma kuli Komiti ya Mulimo iya Cilonganino.
8 Amakombe Ayakasangwako Ukufuma ku nse ya Ncende Yapeelwa: Mupepi na lyonse, icifulo icipeelwa kuli imwe ukusangwako ciba ni cimo icipalamishe ku cilonganino cenu. Ukukwata apa kwikala pakumanina, impapulo, ifya kulya, umwa kusendama, na fimbipo cishintilila pa kutunga kwa kuti icinabwingi ca bakasabankanya bakasangwa kwi bungano uko icilonganino cabo capeelwa. Nangu cibe fyo, nga ca kuti pa mulandu usuma mukasangwa kwi bungano pa mbali ya ilyo mwapeelwa kabili mulekabila umwa kusendama, kalemba wa cilonganino kuti amupeela Formu wa Kulomba Umuputule, untu mulingile ukwisusha no kusaina kabili lyene ukuutuma ku cishinte ce bungano uko mukasangwa.
9 Ukubombela Pamo Kwenu Kulakabilwa: Imitantikile yatelela no kutunguluka iyo imibombele ya mayanda ne ya fya kulya ibombelamo ishintilila pa kubombela pamo ukwa uli onse uubimbilwemo. (Linganyako AbaHebere 13:17.) Sosaite ilatasha nga nshi ukwafwilisha kushaiwamina uko imwe bamunyina na bankashi mwapeela ku mitantikile ya mulimo wa fya kulya pa mabungano ya citungu pa myaka. Ici cacilenga ukucitikako mu misumba ukusonkela ifibansa fisuma no kusakamana ifipooswa fye bungano. Na kabili calilenga ukuti mwikale pa cifulo ce bungano pa nshita ya kutuusha iinono iya kasuba pa kati kabili ukubapo, pa nshita yalinga kabili abapembesulwa, kuli programu wacilapo ukucindama uwa ku mupashi.
10 Pa kuba ababimbwamo mu mabungano ya bantu ba kwa Yehova, tulakoshiwa ukucita ukufwaya kwa kwa Yehova kabili tulacingililwa ku kusonga kwa ku calo ukwa ku nse uko ukwinganyanyantila icitetekelo cesu ica Bwina Kristu. Bonse kuti twaba aba kutasha ukuti Yehova alipayanya ifi fiputulwa fya nshita ifya kupembesula kwa ku mupashi ku bantu bakwe abaipeela muli ino nshita ya mpela.
[Icishibisho kwi Bumba lya Baeluda: Kalemba wa cilonganino alingile ukubomba pa fyebo fyonse ifikumine kwi bungano no kubilisha pa Kulongana kwa Mulimo ukwa nshita ya ku ntanshi. Baeluda bonse bakafwaya ukubombela pamo mu kukumanina ku kushininkisha ukubombapo pa fyebo fikumine kwi bungano mu kwangufyanya, mu kucincimuka, kabili mu kufumamo cimo.]