Ilyashi lya Teokratiki

Bolivia: Umusambo wacitile lipoti icipimo cipya ica pa muulu ica bakasabankanya 9,588 mu October. Na kabili bafikile pa fipimo fipya ifya pa muulu mu masambililo ya Baibolo aya pa ŋanda, ifipempu fya kubwelelamo, bakasabankanya ba mu filonganino, na bapainiya ba nshita yonse. Bakasabankanya ba mu filonganino bafikile pali avareji wa maawala 14 mu butumikishi bwa mwi bala.

India: Mu October icipimo cipya ica pa muulu ica bakasabankanya 13,217 califikilwepo. Ici cali cipimo cabo ica pa muulu icalenga butatu mu kukonkana.

Lithuania: Lipoti wa mu October alangisha icipimo ca pa muulu icipya ica bakasabankanya 871, ukwingilishiwako kwa maperesenti 39 ukucila October wa 1992.

Zambia: December 19, 1993, yacitile ubunte ukupwishe Sukulu lya Kukansha Ilya Batumikishi ukwa basambi 25 ilyacitilwe mu Zambia. Abasambi bafumine ku fyalo fya ku kapinda ka ku kulyo aka Africa fisano. Kosi wa kukansha kwashika ukwa myeshi ibili apekanishishe abasambi ku kwaafwa bwino ifilonganino bakalabomba na fyo. Amakalasi yalundwapo yane yakacitwa pa Makeni mu 1994. Baeluda na babomfi batumikila abashimbe e bengasangwa kwi sukulu.