Languluka Ukukwata Ukulembesha kwa pa Lobe
1 Twalishiba ukuti calibe ca kukafyo mutima ukupokelela kalata wa kukoselesha ukufuma ku cibusa capalamisha nelyo umuntu wesu. Nangu cibe fyo, ni kwi muli ishi nshita sha kumanama kuntu umo engasanga ukusansamusha kwa cine cine? Ukwabulo kutwishika, caba kupitila mu kupokelela no kubelenga Ulupungu lwa kwa Kalinda na magazini unankwe, Loleni!
2 Nangu cingati twalikwata ukwankulana kwakulisha ukwa bacila pali bakasabankanya ba Bufumu 80,000 mu Zambia, cili ca kusakamika ukumono kuti abengi muli bakasabankanya besu aba Bufumu capamo ne ndupwa tabapokelela bamagazini pa mulandu wa kuti amaakaunti ya filonganino ifingi yalisalwa. Lelo nangu fye ni lintu akaunti alisalwa, bakasabankanya kuti nalyo line bapokelela bamagazini. Mu nshila nshi? Pa kukwata ukulembesha kwa pa lwabo. Nangu cibe fyo, icalembwa cilelango kuti icipendo ca kulembesha ica Ulupungu lwa kwa Kalinda na Loleni!, ukukumbinkanya indimi shonse shine, cili fye no bwingi bonse pamo ubwa 11,879. Ici cilelanga ukuti ubwingi ubwa bamunyinefwe na bankashi mu filonganino tabakwata ukulembesha. E co, bushe icili conse kuti cacitwa pa lwa iyi mibele? Mu kushininkisha ee!
3 Twalishibo kuti Sosaite yananya impapulo pa mutengo unono pa kusuminisha icintubwingi ukukwatako. Cila mweshi, abantu ilingi line balabika pa mbali indalama shabo ku kushita ifintu kabili fimo ifya ifi fintu fyalilumo mutengo. Mu nshila imo ine, mulandu nshi te kubikila pa mbali indalama ku kulembesha kwa pa lobe? Aba bamagazini bakwatamo “ifya kulya mu nshita iyene” ifipayanishiwa no “musha wa cishinka kabili uwashilimuka” na muli fyo tulekabila ukubabika pa mutande wesu uwa fiise ntanshi.—Mat. 24:45-47.
4 Ku ca kumwenako, mu ncende sha mu mishi mu Zambia, umo abantu abengi basange mikalile yabo ukupitila mu kulima, April na May iba ni nshita ya kulobolola na muli fyo abengi kuti baenekela ukukwata indalama shabo isha pa mwaka ukufuma ku filimwa fyabo mupepi na pali iyi nshita. Nga ca kuti muli bamo pali aba, mulandu nshi te kulangulukila ukubomfyapo indalama shimo ishipokwa ku kukwata ukulembesha kwa pa lwenu ukwa imwe bene no kwa filundwa fimbi ifya lupwa lwenu? Mu kushininkisha, ifwe bonse tufwile ukupeelako kulanguluka ku kukwata ukulembesha kwa pa lwesu. Pa kulembesha, ciletubululwa ukuti mulebomfya adresi wa cilonganino, pa kuti nga ca kuti icilonganino cenu caba umwabela impito ya cimbayambaya ca Sosaite, lyene Sosaite ikatuma ukulembesha kwenu mu nshila imo ine intu impapulo shiletelwamo ku cilonganino cenu.
5 Mu cine cine, pa kupokelela ukulembesha, mukalambulwa mu kuba no bwishibilo bwa ku mupashi no kukoselesha. Moneni fimo fintu bamo aba muli bamunyina ukufuma mu ncende shalekanalekana balandile pa lwa kukatama kwa bakasabankanya ukukwata ukulembesha kwa pa lwabo: “Abafyashi bandi tabaali bakankaala, lelo ifwe bonse bane fwe bana twalikwete ukulembesha kwa pa lwesu. Lyonse naletontonkanya ukuti Sosaite yalinjishibe pa lwandi. Nangu fye ni lintu twali tatulaishiba ukubelenga twalikwete ukulembesha kwa pa lwesu ukwa Ulupungu lwa kwa Kalinda.” “Nalishiba ulupwa lumo umo icilundwa cimo na cimo cipokelela kope wa pa lwakwe ukupitila mu kulembesha. Balicilapo kukongamina ku kubelenga lwene kabili ukusonga kwa luko ukusuma kulamonekesha lintu baletambika lwene pa mwinshi.”
6 Mu cituntulu calibe cisuma ukumono kuti ubwingi ubwa ifwe tulakwata kope wa pa lwesu uwa Baibolo na kope wesu uwa lwimbo lintu tulesangwa ku kulongana. E co mulandu nshi na kabili te kubela uwafwaisha ukukwata ukulembesha kobe we mwine? Ilintu washininwa ulwa kumwenamo kwaibela ukwa bamagazini besu babili, mu cifyalilwa fye, ukasanguka kalembesha wa lyonse.