Umukululo wa Cipusho

◼ Cinshi cilingile ukucitwa ku malipoti ye sambililo lya Baibolo pa numa kalemba nalonganya lipoti wa mulimo wa mwi bala uwa cila mweshi?

Kalemba alingile ukusunga amalipoti ye sambililo lya Baibolo mu mbokoshi yakwe iya mafaelo iya lyonse pa myeshi ibili; pa numa ya ico, amalipoti ye sambililo kuti yapeelwa kuli bakatungulula ba Masambililo ya Citabo pa Cilonganino abengasanga yene ukuba aya kwaafwa mu kupeela ukukoselesha no kwafwilisha kwa pa lwabo kuli abo bakasabankanya abaletungulula amasambililo ya Baibolo aya mu ŋanda. Ukwaafwa kuti pambi kwapeelwa ku bantu balesambilila na bo bene.

Bakatungulula be sambililo lya citabo balingile ukutukuta ukwishibana na bantu balesekelela no kubakoselesha ukubishanya ne bumba lye sambililo lya citabo ilya cikaya, nga cingacitika. Katungulula we sambililo lya citabo kuti alanda mu kubamo kukoselesha kuli bamunyina ne nkashi pa lwa masambililo yabo aya Baibolo, nakalimo ukushukila akashita pa ntanshi nelyo pa numa ya kulongana kwa lyonse ukwa cilonganino ku kucite fyo. Kuti pambi aba na maka ya kutantika ukwendela capamo na bakasabankanya bamo ku masambililo ya Baibolo yabo aya mu ŋanda no kupeela ukukoselesha kwa ku mupashi muli iyo nshila. Na kabili kangalila wa mulimo kuti apeela ukukoselesha ukukuma ku mulimo wa masambililo ya Baibolo aya mu ŋanda lintu atandalila ibumba lye Sambililo lya Citabo pa Cilonganino, ukubomfya ifyebo ifipayanishiwa pali lipoti we sambililo lya Baibolo ilya mu ŋanda.

Faelo wa kwa kalemba uwa malipoti ye sambililo lya Baibolo alingile ukubapo kuli kangalila wa muputule lintu atandalila icilonganino. Na kabili kuti pambi aba na maka ya kwendela capamo na bakasabankanya bamo lintu baletungulula amasambililo ya Baibolo yabo aya mu ŋanda. Ici cilingile ukushinina ukuba ica kukoselesha ukucilisha ku musambi kabili ica kwaafwa kuli umo uuletungulula isambililo. Nelyo kangalila wa muputule kuti pambi aba na maka ya kutandalila bamo aba aba bantu balesekelela pa nshita shimbi mu kati ka kutandala kwakwe.

Ilili lyonse lintu isambililo lya Baibolo ilya mu ŋanda lyalekwa, ici cilingile ukulangililwa pali slipi wa lipoti we sambililo lya Baibolo, ukulondolola umulandu. Lintu kangalila wa muputule atandalila icilonganino, akapituluka mu malipoti ye sambililo lya Baibolo. Kuti pambi caba ukuti bamo abaleka ukusambilila kwabo kuti baafwiwa ukutesekesha ku cipimo cakulilako ulwa kukabila kwabo ukwa ku mupashi. Fintu cingaba icawamisha nga ca kuti amasambililo yamo ayalekwa yengatendekwa cipya cipya na bantu ukwafwiwa na kabili lwa ku mupashi!

Ifwe bonse twaliba abasekelela nga nshi mu mulimo wa kupanga abasambi kabili tukafwaya ukushukila akashita akali konse ku kukoselesha no kwaafwa abo abapya abaleisa ku kwishiba icine. Amalipoti ye sambililo lya Baibolo kuti yaafwa. Katungulula we Sambililo lya Citabo pa Cilonganino kuti apoosa amaslipi ya kale cila mweshi ilyo apokelela ayapya ukufuma kuli kalemba.