Umukululo wa Fipusho

◼ Kusakamana nshi kulingile ukupeelwa ku fisolobelo tubomfya mu mulimo wa kucitilo bunte?

¹ Nangu cingati kasabankanya wa mbila nsuma nakwata imipeelele ya mu Malembo iyalinga mu muntontonkanya wakwe, kuti pambi aba uushaipekanya lintu caisa ku fisolobelo abomfya. Lintu ali pa mwinshi, te kuti pambi akwate ulupapulo luletambikwa. Bamagazini, amabroshuwa, na matrakiti mu cola cakwe ica mu bunte kuti pambi fili ifyafunyanya nelyo ifyalepauka. Kuti pambi afilwa ukumona apo abikile pensulo nelyo icalembwa ca ku ŋanda ne ŋanda pa mulandu wa kuti icola cakwe tacilongelwe bwino. Calicindama ukusakamana nga nshi ifisolobelo fyobe pa ntanshi ya kwakana mu mulimo wa mwi bala.

² Fintu nshi icola ca mu bunte icaipangasha bwino cilingile ukukwata? Baibolo yalicindama. Longamo ifyalembwa fya ku ŋanda ne ŋanda. Shininkisha ukuti naukwata ulupapulo ululeshalikwa muli uyo mweshi. Bamagazini ba ndakai, capamo na matrakiti na mabroshuwa, na fyo filakabilwa. Senda icitabo ca Ukupelulula. Ukukwata Ubutumikishi Bwesu Ubwa Bufumu ubwa nomba line kukakulenga ukupituluka mu mipeelele itubulwilwe pa ntanshi ya kuya mwi bala. Lintu ulebombela mu cifulo umo cilemoneka ifyo kuti wakumanya abantu abalanda ululimi lwa cilendo, kuti cawama ukukwata akatabo ketwa Good News for All Nations. Ukukwatako kope wa lumo ulwa mpapulo shesu ishalembelwa abacaice kuti kwakwaafwa ukuba uwaipekanya ukulanda na bapungwe.

³ Fyonse ifilebomfiwa filingile ukulongwa busaka busaka mu cola cobe. Icola mu cine ceka tacilekabila ukuba icipya, lelo cilingile ukuba ica busaka kabili icilemoneka bwino. Icola cobe ica mu bunte caba lubali lwa fisolobelo fya kubomfya mu kubilisha imbila nsuma. Cisunge bwino.