Bushe Ulamona Ukukabila?
1 Yehova alondololwa nga Kaafwa kabili Icubo. Natwishiba kuti twaya kuli wene mu nshita sha kukabila kabili akatwaafwa. (Amalu. 18:2; 46:1) Kuti twapashanya iyi mibele ya kulangulukila pa kwafwilisha bambi lintu twamona ukukabila.
2 Cinshi cikunta umuntu ukuitendekelako ukwaafwa umuntu umbi? Abantu abengi bamone ci nge cintu cabamo kutemwa, icabamo kulangulukilako. Mu kushininkisha Icebo ca kwa Lesa cikoselesha cene. (Rom 15:1) Paulo atucincishe ‘ukukanalolekesha ifyesu fyeka lelo ukulolekesha ne fya banensu.’—Fil. 2:4.
3 Ici cintu cimo ico ifwe bonse twingasekelela ukucita. (Imil. 20:35) Paulo asoobwele Timote wacaice nge ca kumwenako ca “untu engasakamane cine cine ifya kuli” bamunyina. (Fil. 2:20) Cili icisuma ukuti twalikwata abacaice abengi mu filonganino ilelo aba mibele yapala wene. Lelo nampo nga tuli baice nelyo tuli bakalamba, kwalibako ifintu ifyo twingacita nga twamona ukukabila.
4 Bushe walibala aulanguluka pa lwa bamo abakabila ukupeelwa ukwangwako kwawaminako? Nakalimo kuti munyina nelyo nkashi aali mu cipatala, kabili abanono balishile mu kumupempula; nelyo umuntu umo abulwa amaka, lelo takwali nangu umo uwa kumushitilako nelyo ukumwafwilisha utumilimo twa pa ŋanda. Yesu amona abo ababombela Yehova nge filundwa fya lupwa abo mu cine cine basakamana umo no munankwe. (Marko 3:33-35) Mu mulumbe wa mpaanga ne mbushi, alangile ukuti abo abaipakisha ukuba ku kulyo kwa kusenamina kwa Mfumu baipakishe fyo pa mulandu wa kwaafwa kwabo bamunyina ba Mfumu.—Mat. 25:40.
5 Ni mu Nshila Nshi Ningaafwila? Cinshi cingacitwa ku kupayanya ukwaafwa lintu kwaba ukukabila kwamonekesha? Bushe kuti twaitendekelako mu kwaafwa mu nshila imo? Nakalimo kwalibako abakalambako abo bakabila ukukoseleshiwa, lelo tabakwata ifibusa fyapalamisha abengabaafwa. Kuti kwabako abacaice abalekabila ukwaafwa. Ulupwa lwa balesekelela abapya mu kuba na bana bafulilako kuti pambi baisa ku Ŋanda ya Bufumu lintu uo basambilila nankwe ashishile. Kuti pambi batasha ukukwata umuntu umo uwingaitemenwa ukubaafwa ukubomba na bana babo.
6 Ilyo tulekula mu kutemwa kwa cine no kwa kuteyanya kwa kwa Yehova, na kabili tulakula mu kutesekesha no kwangwako kuli bambi mu cilonganino. Paulo atukoseleshe ukukushako ukubishanya muli kuno kuloshako. (2 Kor. 6:11-13) Yesu akomaile pa kuti ukulanga kwesu ukutemwa kuli umo no munankwe e nshila ya ntanshi iyo tulangishishamo ukuti tuli bakonshi bakwe mu cine cine.—Yoh. 13:35.
7 E co lintu twamona ukukabila, ukutemwa kwa cine cine ukwa kuli bamunyinefwe no kwa cilonganino filingile ukutukunta ukuitendekelako no kwaafwa mu nshila iili yonse iyo twingaafwilamo. (Gal. 6:9, 10) Uku kwangwako ku bantu bambi kulatukulila capamo mu fikakilo fyapalamisha ifya kutemwa no kwikatana. (1 Kor. 10:24) Muli iyi nshila, tubomba ulubali lwesu ku kwaafwa ukukumanisho kukabila mu cilonganino.