Ukulumbanya Yehova mu Kwankulana Kwaikatana!
Ukwimba kwaba lubali lwa lutambi lwa cina Afrika. Mu mushi wa bena Afrika uwine wine, ilingi line kuti waumfwa abanakashi balelima ukukonkelesha mu nyimbo sha cishilano, imisepela ukuŋwiŋwinsa inyimbo isho batemwa ilyo balekama umukaka ku ŋombe, na baume ukwimba mu kubwekeshabwekeshapo kwati nalimo balekoselesha iŋombe shabo ukutiinta icipe cabo icafina. Kwalibako ulwimbo mupepi na ku mulimo uuli onse mu mishi. Ukucila na pali ico, ukwimba kwaba lubali lwa kupepa kwesu. Pa mulandu wa ici, Sosaite yalikatamika nga nshi ukwimba inyimbo sha Bufumu. Nangu cibe fyo, calimonwa ukuti mu filonganino fimo, inyimbo shitantikilwa programu shilapyanikwapo. Inyimbo pa kulongana kwesu shilasoobolwa mu kusakamanisha pa kuti shilingane na programu. Kulabako ukusakamana pa kusoobola inyimbo sha pe Sambililo lya Ulupungu lwa kwa Kalinda, Ukulongana kwa Mulimo, ne Sukulu lya Butumikishi Bwa Teokrasi. E co lintu baeluda balepeela amalyashi ya pa cintubwingi, basoobolola ulwimbo ululelingana no mutwe wa lyashi lyabo.
Pa kutwaafwa ukulangisha ukutesekesha ku nyimbo shesu ishishaiwamina pa kulongana kwesu, tulekoseleshiwa ukusambilila inyimbo isho shatantikilwa libela, pa kuti twingabomfya ishuko lyesu mu kusakamanisha no kukakililwako kwesu ukwa kwimba shene. Mu nshila imo ine intu twishiba pa lwa makampeni ya mulimo wa mwi bala imyeshi itatu mu kubangilila pa kuti twingaorda no kupokelela impapulo shilekabilwa mu kwangufyanya nga nshi, e fyo na kabili tulecinkulwako ukwishiba inyimbo sha kulungatika isha kubomfya pa kulongana mu kwangufyanya nga nshi.
Na kabushe, mu myaka yapitapo, bamunyina mu Zambia balishibikwe na bamunyinabo ba mwi sonde lyonse ku kwimba kwabo. Presidenti wa kale uwa Watch Tower Society, Nathan H. Knorr, pa numa ya kusangwa ku kulongana kukalamba ukwa Nte sha kwa Yehova mu Zambia, alondolwele bwino iciunda ca kukumbamo ica myanda ya mashiwi yaikatishe mu kwimba kwaikatana. Atile: ‘Ukwimba cali cintu cimo icaletele ukucincimuka kukalamba kabili ukwaletele ifilamba ku menso—cali icayemba nga nshi. Takwali ifilimba fya nyimbo ifyakabilwe, kabili icamoneke ukuba ukwimba kwa ciputulwa capikana kwabombelwepo no kwanguka kwa kupapusha. Iciunda caali icawamisha.’ Pamo nga icilonganino no muntu umo umo, twicipanga ukuba icibelesho ukupyanika inyimbo shimbi pali isho Sosaite isoobwele. Twapaapaata bomfyeni amatepu ya Sosaite ku kusambilila ishi nyimbo. Bakangalila ba miputule bakabebeta ku kumona ukuti uyu programu natunguluka pa kuti ifwe bonse tulumbanye Yehova mu kwankulana kwaikatana!
Nomba line fye tukalasangwa ku Mabungano ya Citungu aya “Inkombe sha Mutende wa Bukapepa.” Pa kutwaafwa ukupekanishisha no kwakana mu kwimba, Sosaite naisoobola inyimbo shakonkapo isha kubomfya: 8, 15, 16, 26, 38, 42, 59, 111, 123, 127, 159, 170, 174, 187, 207, 211, 215 na 212. Baeluda balekoseleshiwa ukupekanya imitantikile yashininkishiwa iya cilonganino iya kutendeka ukubelesha ishi nyimbo. Icipimo cintu twafikapo mu kutesekesha ukupayanya kwa kwa Yehova ukwe bungano lya uno mwaka, epo tukafika na mu kumwimbila umutima onse.