Ukubomba na Bamagazini ne Fitabo mu Cilonganino

¹ Icilonganino cilatupayanishisha impapulo pamo nga amaBaibolo, ifitabo, ututabo, bamagazini na matrakiti. Sosaite ilatuma ishi mpapulo ku cilonganino ilingi line pa nkongole kabili pa numa ya ico shilashitwa na bakasabankanya na bapainiya, abo mu kukonkapo bashitambika ku bali no buseko mu cine.

² Pali ino nshita, bakangalila benda balebebeta amaakaunti ya filonganino. Ukulingana na malipoti yapokelelwe ukufika ino nshita, ifilonganino fimo filebombesha apakalamba ukuwamya amaakaunti kabili tuletasha ifyo filonganino. Na kabili ici mfula yalokele bwino uno mwaka, tulesubila ukuti ifilonganino fyalundwako fikashukila ico ku kushitisha ifisabo balobolwele no kuwamya amaakaunti yabo. Ifikalamba ifilenga amaakaunti ukubipa mu filonganino ifingi fyaba: “Impapulo shapokwa na bakasabankanya pa nkongole”; “Takwaba ifyalembwa fisuma ifyasungwa”; kabili “Amaakaunti tayapitulukwamo.”

³ Pa mulandu wa ici, kuti twaipusha ifyakonkapo: Bushe calilinga ukupeela bakasabankanya bamagazini ne fitabo pa NKONGOLE? Ni shani fintu bamunyina bapeelwa ukusakamana ifi fipe balingile ukubomba ne fishingamo fyabo? kabili bushe bapainiya balingile ukushitila indupwa shabo impapulo pa mutengo wa bupainiya?

⁴ Ica kubalilapo, bushe ishi mpapulo sha bani? Ukwabula ukutwishika, sha Sosaite kabili ukulingana na makambisho ya Sosaite mu kubilisha ayaleti “Takuli na Kabili Ukukongwesha Ifitabo!” mu Ubutumikishi Bwesu Ubwa Bufumu ubwa April 1994, takuli nangu umo uulingile ukupeelwa impapulo pa nkongole. Cimo cine na kuli bamagazini no kulembesha. Tafipokwa pa nkongole iyo. E co nga ca kuti eluda nelyo umubomfi utumikila uulesakamana ifitabo aali no kupeela ifitabo pa nkongole nelyo ukusuminisha umo ukupoka pa nkongole, bushe uko kukongola nelyo bupuupu? Bupuupu, pa mulandu wa kuti takwaba eluda nelyo umubomfi utumikila uwakwata insambu sha kupeela ifi fipe pa nkongole. Caba kusuusha ikambisho lyafuma ku Sosaite. (Moneni Ulupungu lwa kwa Kalinda ulwa April 15, 1994, amabula 19-24, “Bushe Bupuupu Icine Cine?”) Nangu cibe fyo, ilyo iyi mitantikile tailatendeka ukubomba, bakasabankanya bamo balipokele impapulo pa nkongole kabili tabalipila ukufika na nomba. Nga e fyo cili, balingile ukulipila inkongole shabo ku cilonganino mu kwangufyanya ukufika apo bengapesha.—Ilu. 37:21.

⁵ Ababomfi batumikila ababomba ne fitabo na bamagazini balabomba umulimo wakatama. Balikwata ishuko lyapulamo kabili pa mulandu wa ico balingile ukubomba imilimo yabo mu kusakamanishisha. Bamunyina bapeelwa ifi fishingamo balingile ukubeleshanya sana na makambisho mu Umutande wa Mpapulo sha Watch Tower (Amakambisho) na S-AB-27 (Amakambisho pa fya Kubomba na Maakaunti ya Cilonganino), pa kuti impapulo tashitulumene. Ifyo icilonganino cilekabila filingile ukupimununwa mu kubangilila no kubilishiwa ku cilonganino lintu mulepanga ukutuma orda wa mpapulo.

⁶ Bapainiya na bakangalila benda balashita bamagazini ne fitabo fya kushalika pa mitengo yaibela. Ici cilabaafwa ukulipila ifipooswa fyabo ifya mu butumikishi. Bapainiya na bakangalila benda tabasuminishiwa ukushitila bakasabankanya bambi, indupwa shabo nelyo ifibusa ifitabo na bamagazini pa mitengo yaibela. Ici kuti caba kulyo mundemwa kabili kuti camonwa nga ukwibila Sosaite. Bakasabankanya balingile ukushita impapulo shabo ku cilonganino pa mutengo wa bukasabankanya. Indupwa sha bapainiya na balupwa lwabo abashili ni bapainiya balingile ukushita impapulo shabo pa mutengo wa bukasabankanya. Nga ca kuti painiya nelyo kangalila wenda apeela kasabankanya impapulo alingile ukulipilisha umutengo wa bukasabankanya no kupeela umubomfi wa ndalama ishipulilemo pa kuti engatuma ku Sosaite.

⁷ Abo bakwata ishuko lya kusakamana ifipe fya cilonganino na ifwe bonse fwe balebombako umulimo wa kufyananya, tulingile ukwibukisha ukuti tukabila ukuba abacetekelwa kabili aba cishinka mu nshila tubomfeshamo “mamone ushalungama.”—Luka 16:9-13.