Bushe Mwalilanguluka pa Fyabimbwamo?
1 Munyina nelyo nkashi uwalwala, inshita shimo kuti apingulapo ukuya kwi tauni limbi nelyo icalo ku kundapwa. Nakalimo ici kuti caba ifyo pa mulandu wa kubulisha icipatala mu ncende yabo nelyo nga icipatala calibipa. Na kabili kuti caba pa mulandu wa kuti badokota babako te kuti bomfwane na baNte mu mulandu wa mulopa na muli ifyo pa kumfwila “ukusambilisha kwa bulesa” pa lwa kutaluka ku mulopa, umulwele afwile aya kumbi. (Imil. 15:28, 29) Nga ca kuti umulwele nelyo balupwa lwakwe basalapo ukucita ifyo, ni bani balingile ukulipila indalama shilefwaikwa? Nelyo nga ca kuti umulwele uwendele ukufuma kwi tauni limbi afwila mu cipatala ilintu aleundapwa, bushe ifilonganino fipalamine ku cipatala e fishingemwe ukufwaya indalama sha pa cililo? Bamo te kuti beshibe ica kucita. Lelo ukutontonkanya pa fya kutungulula ifya mu Baibolo pa lwa fishingamo fya lupwa kutuleta ku kusondwelela ifyakonkapo:
2 Ifipooswa fya Kuteensesha Abalwele: Ifi fishingamo fya mulwele na balupwa lwakwe. (Gal. 6:5; Rom. 13:8) Nangu cibe fyo, lintu indalama shilefwaikwa shacila pa shintu balupwa lwakwe abapalamisha bengakumanisha ukulipila, lyene balupwa lwakwe bambi e bakwata ishuko lya kwafwilisha. (Linganyeniko 1 Timote 5:4.) Aba balupwa balesanshamo na bashili Inte sha kwa Yehova. Na kabili, ulupwa, mu kwafwilishiwa kwa baeluda, bakafwaya ukubebeta bwino bwino ukupayanya ukuli konse ukwa kamfulumende ukwabelako ku kwafwilisha ukulipila ifi fipooswa. Ishi mbali shonse shilingile ukufwailisha ilyo bashilabimbamo icilonganino. Kwena, bamunyina abali bonse abengebukila pa lwa cacitika bali abantungwa ukuitemenwa ukupeela icili conse ico bengatemwa. (Moneni Abateyanishiwa ku Kupwilikisha Ubutumikishi Bwesu, amabula 122-3.)
3 Icilonganino cilabimbwamo lyeka fye lintu kushiliko balupwa aba kusakamana munyina kabili lyeka fye lintu aabomba mu busumino pa nshita yalepa. Nangu cibe fyo, nakalimo kuti caipushiwa ukuti, cilonganino nshi cilingile ukushingamwa muli ifi? Bushe cilonganino cintu umulwele afumako ku mwabo nelyo icilonganino umo umulwele afikila icapalamina ku cipatala ateekelwe? Ukwabula ukutwishika cilonganino cintu afumako ku mwabo. Baeluda kulya ebeshibe umulwele ne mibele yakwe. Nangu ni fyo, bamunyina bamo baliisa ku cipatala mwi tauni limbi nelyo icalo kabili balitwika icisendo pa cilonganino ca muli iyo ncende. Tabesa ne fya kulya ifili fyonse nelyo indalama sha kubomfya abene nelyo abo bendele na bo. Ilingi line tabakwata ne ndalama sha kubwelelamo kabili icilonganino capalamina ne cipatala cilayumfwa icapatikishiwa ukubasakamana. Ici te cisuma kabili te ca mu malembo. Abantu balingile ukuipekanya ukubomfya ifikwatwa fyonse ifyo bakwata mu nshita sha musango yo isha bukangalume ukucila ukuba icisendo cafina pali bamunyina.
4 Imitantikile Ikabilwa: Ukuya kwi tauni limbi nelyo icalo ku kundapwa kwaba kupingulapo kwa muntu pa lwakwe. Lelo bamunyina tabalingile ukuya ukwabula intanshi ukupenda ishikapooswa ku kwishiba nga kuti bakumanisha ukucita ifyo. (Linganyeniko Luka 14:28.) E co, kuti caba ica mano kuli balupwa nelyo uyo muntu umwine ukulanshanya na bekala ku cifulo cintu balefwaya ukuyako, ukwishiba indalama sha kulipila ishikafwaikwa ilyo bashilaima. Nga ca kuti baleya ku nse ya calo, caliba bwino ukwipusha iofesi lya musambo. Iofesi lya musambo lyene kuti lyalanshanya no musambo uko balefwaya ukuyako pa kuti bengomfwa ifyebo ulupwa lulekabila pa lwa badokota ne cipatala. Iofesi kuti lyaebela libela umusambo muli ico calo pa lwa nshita ya kufika, pamo pene ne cipatala uko umulwele akondapilwa. Nga ca kuti balupwa baebwa ifyo fyebo, lyene kuti batendeka amapekanyo ya pa lwabo no kutantika ukukuusha umulwele ukuya kuli ico cifulo. Kwena, ifyebo pamo nga nampo uleenda ni kasabankanya wabatishiwa kabili alashimikwa bwino mu cilonganino ca ku mwabo nelyo iyo, fikakabilwa. Muli iyo nshila, Komiti wa Kumfwaninamo ne Fipatala mu calo cimbi kuti aebwa ukuipekanya ukwafwilisha mu filekabilwa fyonse, nga cingacitika.
5 Lintu umo aya ku calo cimbi ku kundapwa mu cipatala, talingile ukutunga ukuti napamo iofesi kulya nelyo bamunyina mu filonganino uko kwine bakamupa indalama sha kwendela ne sha mu cipatala. Kabili nga ca kuti bamunyina ba muli ici cifulo balangisha bukapekape no kupayanya umwa kwikala umulwele uulepepemuka nelyo balupwa lwakwe abalemuteensha, tacilingile ukusondwelelwa ukuti waba mulimo wa bamunyina ba muli ico cifulo ukupeela iŋanda nelyo ifya kulya apa fye, ukucilisha lintu abalepokelela ifyo fintu nabakwata ifyo bengasangwilako pa kuti bengacefyako indalama shilepooswapo. Kabili uuli onse talingile ukutunga ukuti badokota bakondapa ukwabula umulopa nga ca kuti takwaliko ukulanshanya kwa mu kubangilila no kusuminishanya pa lwa kundapa ukwabula umulopa. Ukupembelela ukufikila mwatwalwa mu muputule wa kulepwilamo e lyo mwalaishibisha shiŋanga wa kulepula ukuti muli umo uwa Nte sha kwa Yehova cilaba kucelwa nga nshi.
6 Indalama sha Mapuekanyo ya fya Cililo: Inshita shimo, pa numa ya kwenda ukufuma kwi tauni limbi ku kundapwa, umulwele afwila kulya. Mu fifulo fimo, amabumba ya baeluda na babomfi batumikila balicita icilubo no kupanga amakomiti yanono ayendauka ukulaipusha bamunyina na bankashi mu filonganino fipalamine ku cipatala, ukusangwilako indalama sha kubomfya ku mapekanyo ya fya cililo. Nangu cibe fyo, ukukonka ifya kutungulula ukufuma pe bula 122 mu citabo ca Ubutumikishi Bwesu kukalanga ukuti indalama sha kulipila ku mitantikile ya cililo na sho shine shipendelwa mu ‘ukukabila kwa kwafwiwa ku mubili pa mulandu wa bukote, ukulwalilila nelyo ukupelelwa kumo uko bashingalama.’ E ico, ifishinte fyalondololwa pa muulu ukufuma mu citabo ca Ubutumikishi Bwesu filabomba na ku mitantikile ya cililo na ko kwine.
7 Ukumfwikisha ifi fya kutungulula kukalenga umo umo ukwishiba ica kucita mu kupayanya ifipooswa fyabimbwa mu kulwala ne fya mapekanyo ya fya cililo.