“Ukwaafwa pa Nshita Yalinga”
1 Fintu ciba ica kupembesula ukwafwiwa lintu fye tulekukabila! (Heb. 4:16) Pe Bungano lya Citungu ilya “Inkombe sha Mutende wa Bukapepa” umwaka wapwile, twalisekelele lintu twapeelwe ifibombelo fyaibela fibili ifya kwaafwa pa nshita fye yalinga.
2 Icitabo, Icaba Inkaama ku Nsansa sha Lupwa, caishile fye pa nshita yalinga. Cilanda pa mbali shine ishilundulula insansa mu: (1) Ukuilama, (2) ukwishiba bumutwe, (3) ukulanshanya kusuma, na (4) ukutemwa. Ukukonkomesha kwalondololwa mu citabo ca Insansa sha Lupwa kukaafwa indupwa shonse ishikabomfya kwene ukusanga umutende wa bukapepa. Patuleniko inshita ya kubelenga icitabo mu kusakamanishisha no kucisambilila capamo ngo lupwa nga ca kuti tamulacita ifyo. Belengesheni imbali sha ciko pa kuti mukaipekanye ukucibomfya bwino nga nshi lintu cikalatambikwa ku cintubwingi mu September.
3 Broshuwa wa Cinshi Cintu Lesa Afwaya Kuli Ifwe?, aisa pa nshita yalinga ku kutwaafwa ukwangufyanyako umulimo wa kupanga abasambi. Ilintu kuti abomfiwa ukucilisha mu kwaafwa abantu bashaishibisha ukubelenga, abakalamba ababelenga abengi na bana na bo bene bakamwenamo mu bulondoloshi bwayanguka ubwa fisambilisho fya Baibolo ifya kutendekelako. Kuti aba fye e cintu cilekabilwa ku kutendeka isambililo pamo nga apa kutanukila ukwingila mu citabo ca Ukwishiba. Uyu broshuwa mu kushininkisha kuti aafwa abengi ukutesekesha fintu benganonkelamo apakalamba mu kucita cintu Lesa afwaya.
4 Davidi alumbulwile bwino fintu tuyumfwa lintu abilishe ukuti ‘tabulilwe, umweo wakwe walibweshiwemo, no lukombo lwakwe lwaiswile paa!’ (Ilu. 23:1, 3, 5) Mu buseko tulefwaisha ukwaafwa abantu abengi lwa ku mupashi abafwaisha mu kufumaluka ukwishiba no kubombela Lesa wa cine, Yehova.