Shimikileni ku ba mu Cupo Abashili Nte
1 Cilalenga ukusekelela apakalamba lintu abaupana baikatana mu kupepa kwa cine. Nangu cibe fyo, mu ndupwa ishingi ni umo fye pa ba mu cupo babili e wapokelela inshila ya cine. Ni shani fintu twingabomba na aba aba mu cupo abashili ba Nte no kubakoselesha ukupepa Yehova capamo na ifwe?—1 Tim. 2:1-4.
2 Umfwikisheni Ifyo Baletontonkanya: Nangu cingati aba mu cupo bamo abashili ba Nte kuti bakaana, ilingi line ubwafya bubako bwa kukanayangwako nelyo ukukanaumfwikisha. Umuntu umo kuti amona ngo walekeleshiwa nelyo ukufubila umunankwe wa mu cupo uwasanga ifintu fya ku mupashi ifipya. “Ilyo naali neka mu ng’anda, nayumfwile uwalekeleshiwa,” e fyaibukishe umulume umo. “Namwene kwati nalimo umukashi wandi na bana balembutuka,” e fyasosa na umbi. Abaume bamo kuti batontonkanya ukuti balelufisha ulupwa lwabo ku mipepele imo. (Moneni Ulupungu lwa kwa Kalinda ulwa August 15, 1990, amabula 20-3.) Uyu e mulandu cawamina, nga cingacitika, ukuti umulume asanshiwe ku mukashi wakwe mwi sambililo lya Baibolo ilya mu ng’anda pa kutendeka fye.
3 Bombeleni Capamo: Abaupana ba Nte balebombela capamo bwino nga nshi mu kwafwilisha abantu baupana ukwisa mu cine. Ilyo nkashi aimike isambililo no mukashi, munyina na o aletandalila umulume. Ilingi line munyina aletendeka ukusambilila no mulume.
4 Beni Aba Bucibusa Kabili Aba Cileela: Indupwa mu cilonganino kuti shayafwa pa kwangwa indupwa shishilaikatana mu kupepa kwa cine. Imiku ya kutandala kwa bucibusa iinono nalimo kuti yaafwa uwa mu cupo uushili Nte ukumona Inte sha kwa Yehova pamo nga Abena Kristu ba cikabilila, abasakamana, abasekelela muli bambi.
5 Inshita shimo, baeluda kuti bapituluka mu kubombesha kwa kushimikila aba mu cupo abashili Nte no kumona ifyalundwako ifingacitwa pa kusubila ukubakolopekela kuli Yehova.—1 Pet. 3:1, utulembo twa mwi samba.