Kuti Bamona Ukuti Twaliibela

¹ Umwaka wapwa, abapya ukucila pali 300,000 bailundile kuli ifwe ukupitila mu kubatishiwa. Cinshi aba bantu bamona mu Nte sha kwa Yehova icibalenga ukufwaya ukuba mu kuteyanya kwa kwa Lesa? Mulandu nshi twabela abaibela ku mipepele imbi? Pano pali ifyasuko fimo:

—Tukonka Baibolo te matontonkanyo yesu: Tupepa Yehova Lesa “mu mupashi na mu cine,” nga fintu Yesu Kristu atwebele ukucita. Ici cipilibula ukukaana ubufi bwa mipepele no kukonka Icebo calembwa ica kwa Lesa.—Yoh. 4:23, 24; 2 Tim. 3:15-17.

—Tuya ku bantu, tatubalolela bese kuli ifwe: Twalipokelela umulimo Kristu atutuma uwa kushimikila no kusambilisha, kabili tupashanya ica kumwenako cakwe ica kufwaya abayana. Tulabafwaya pa myabo, mu misebo, nelyo konse uko bengasangwa.—Mat. 9:35; 10:11; 28:19, 20; Imil. 10:42.

—Tulafunda abali bonse Baibolo apa fye: Tatulipilisha pa kubomfya ifyuma fyesu na maka ukubomba amaawala ukucila pali bilioni umo cila mwaka mu mulimo wa kwa Lesa. Tulasambilila Baibolo na bantu abalekanalekana ukwabula akapaatulula.—Mat. 10:8; Imil. 10:34, 35; Ukus. 22:17.

—Tulakanshiwa bwino ku kwafwilisha abantu lwa ku mupashi: Ukupitila mwi sambililo lya pa lwesu ilya Baibolo no kukansha ukupayanishiwa pa kulongana kwa cilonganino, ukulongana kukalamba, na mabungano, lyonse tulasambilishiwa amasomo ya bulesa ayacindamisha ayalenga tulebuutusha bambi lwa ku mupashi.—Esa. 54:13; 2 Tim. 2:15; 1 Pet. 3:15.

—Twalikatamika icine, tulacibomfya mu mikalile yesu cila bushiku: Pa mulandu wa kuti twalitemwa Lesa, tulaalula imibele yesu, ukulaikala ukulingana no kufwaya kwakwe. Ubuntu bwesu bupya ubwapala ubwa kwa Kristu bucebusha bambi ku cine.—Kol. 3:9, 10; Yako. 1:22, 25; 1 Yoh. 5:3.

—Tulatukuta ukwikala no kubomba na bambi mu mutende: Ukulundulule mibele ya bukapepa kulatwaafwo kulama incitilo shesu ne milandile. ‘Tulafwayo mutende no kuukonkelela’ na bantu bonse.—1 Pet. 3:10, 11; Efes. 4:1-3.

² Ifya kumwenako fya mikalile ya Bwina Kristu ifyo abantu bamona mu kuteyanya kwa kwa Yehova filakunta abengi ukupokelela icine. Shi ica kumwenako ca pa lwesu nacikalenge bambi abatwishiba kabili abatubebeta ukwisa mu cine.