Ifyo Twingawamyako Imimbile Yesu pa Kulongana
1 Ni kale ababomfi ba kwa Yehova batendeka ukubomfya inyimbo mu kupepa kwabo. Imyaka nalimo 3,500 ku numa, abena Israele baimbile Yehova amalumbo lintu Abapuswishe pali Bemba Wakashika. Pa numa, inyimbo shaishilesanshiwa mu kupepa pe tempele. (1 Imila. 23:3, 5) Shi kupukuleni pe bula lya kulekelesha ilya citabo cenu ica nyimbo kabili mwalamona ibumba lya bakemba abena Lebi, nabasamuna utunwa ninshi baleimba mu kucincimuka. Ilyo Imfumu Davidi yatendeke ukuteka, ukucila aba pe kumi lya balebombela pe tempele bapeelwe umulimo wa kulumbanya Yehova mu nyimbo. Pali ilya mpendwa, 288 bali ni bakemba basambilishiwa, “bonse abacenjela.” Kuti mwashininkisha ukuti balipooseleko amano ku mulimo wabo.—1 Imila. 25:7.
2 Abena Kristu ba mu kubangilila na bo balebomfya inyimbo mu kupepa kwabo. Umutumwa Paulo afundile bamunyina ukuti: “Mulesambilishanya no kukonkomeshanya; ukwimbila no kutootela Lesa mu mitima yenu ku sha malumbo, ne sha kutasha, ne nyimbo sha bumupashi.”—Kol. 3:16; moneni na Abena Efese 5:18-20.
3 Inte sha kwa Yehova mu nshita sha nomba shilabomfya bwino ubupe bwa kwimba. Icitabo cesu ica nyimbo ica nomba, icitila Imbileni Yehova Amalumbo, cakwata inyimbo shalekanalekana ishisuma isho twingabomfya mu kulumbanya Yehova.
4 Ni shani fintu twingalangilila ukuti tulatasha pa nyimbo shesu isha Bufumu? Kupitila mu kwimba sana pa kulongana! Kemba wa malumbo alembele ukuti: ‘Bamulumbe pantu Lesa acankilwa abantu bakwe.’ (Amalu. 149:3, 4) Kabumba wesu alakutika ku nyimbo shesu, nga fintu fye Akutika ku mapepo yesu.
5 Bushe inshita shimo cilamukosela ukwimba inyimbo sha Bufumu? Sosaite yalipayanya ubwafwilisho ukupitila mu nyimbo sha pali tepu isha kukonkamo. Ifilonganino filingile ukubomfya amatepu ya Sosaite (te matepu yapayanishiwa na bambi) pa kwimba mu kulongana. Imimbile ya kukonka ni ilya iisangwa mu citabo ca nyimbo ica Sosaite, te mimbile imbi iyo bamunyina kuli ico cifulo bengatemwapo. Lelo ifi te fyo ciba lyonse. Inshita shimo, bamunyina abafuma kumbi balafilwa ukwimbako inyimbo sha Bufumu pamo ne cilonganino pa mulandu wa kuti bamunyina ba kuli ico cifulo balekonka imimbile yaibela. Inyimbo ishingi ishapilibulwa mu ndimi shesu kuti shaimbwa muli (soprano, alto, tenor, na bass). Apantu abantu ba kwa Yehova balikatana mu kupepa kwabo, no kuti ukwimba kwaba lubali lwa kupepa kwabo, kuti cabamo amano ukwenekela ukuti tufwile ukwikatana na bamunyina ba mu calo conse mu mimbile ya nyimbo shesu.
6 Ilyo munyina uubombela ku cilimba alelisha amatepu alingile ukushininkisha ukuti iciunda nacilinga. Nga ca kuti iciunda tacileumfwika, icilonganino kuti cafilwa ukwimba. Nga ca kuti munyina uubombela ku cilimba aleimbila pamo ne cilonganino inyimbo sha Bufumu, kuti aishiba nga ca kuti inyimbo shileumfwika nelyo iyo.
7 Ukulunda pa kubilisha inambala ya lwimbo, bamunyina abatungulula ukulongana kwalekanalekana kuti bafwaya ukubilisha umutwe wa lwimbo, pamo ne Lembo apo lushimpilwe, nga nalukuma ifilesambililwapo. Muli iyi nshila, icilonganino kuti caumfwikisha ifyo ulwimbo luleumfwana ne fyebo filesambililwa pa kulongana.
8 Kuti casendako inshita pa kuti mwishibe imimbile yaba mu matepu ya Sosaite. Lintu icitabo ca nyimbo cafumine umuku wa kubalilapo, ifilonganino fimo fyalinonkelemo pa kulongana mu kulisha icisemo cimo icituntulu ica lwimbo lwalaimbwa, lyene ukutendeka ukulisha cipya cipya tepu pa kuti icilonganino cimbe ifisemo fyonse. Napamo inshila imo ine kuti yaafwa icilonganino cenu pa kashita kanono. Natushininkisha ukuti nga mwabombeshako fye panono, mu kwangufyanya muli no kutendeka ukwimba inyimbo sha Bufumu abaicetekela nga fintu bamunyinenwe bacita mu fyalo fimbi.
9 Kuti muleipakisha ukulisha amatepu ya Sosaite aya piano ku ng’anda. Aya matepu yapayanya inyimbo shisuma isha kukutikako ilyo mulecita fimo, kabili yalasangwilako kuli bumupashi bwa pa ng’anda. Ico mwinganonkelamo na cimbi ca kuti aba mu lupwa balabelesha ishi nyimbo.
10 Ukwimba inyimbo sha Bufumu ni nshila isuma iya kulumbanishishamo Yehova. Lintu twaimba mu buseko, kuti twalenga Lesa na bantu ukusekelela.—Amalu. 105:2.