Pepeni Ukuti Yehova Amwafwe
1 Yesu alengele abasambi bakwe ukumfwikisha ubucindami bwa mapaalo ya kwa Yehova mu butumikishi bwabo. (Mat. 9:37, 38) Amapepo yesu aya pa mutima aya kulumbanya no kutootela pamo no kulomba no kupaapaata filangilila ukuti tushintilila pa bwafwilisho Yehova atupa. (Fil. 4:6, 7) Amalembo yatucincisha ukupepa ‘amapepo aya musango onse pamo na ya kupaapaata,’ kabili ici kuti cabomba na ku mapepo yesu pa lwa butumikishi.—Efes. 6:18.
2 Tulumbanya Yehova mwi pepo pa mibele yakwe iishingalinganishiwako na pa fyo apwishishisha. Na kabili tumulumbanya ngo Watupeela imbila nsuma iyo tushimikila. Alilinga ukumulumbanya pantu ni wene e ulenga ubutumikishi bwesu ukubombwa bwino.—Amalu. 127:1.
3 Amapepo yesu aya kutootela yalangilila ukuti tulatasha pa fyo Yehova atulenga ukumfwikisha pa lwa mifwaile yakwe. Bushe te shuko ukushimikilako bambi icine ca Bufumu? Tulatasha Yehova pali fyonse ifyo tupwishishisha mu butumikishi.—Amalu. 107:8; Efes. 5:20.
4 Nge calinga, tulomba Yehova ubwafwilisho mu kusanga abantu abengasumina ukusambilila Baibolo na pa kufika pa mitima yabo ne cine. Ukulomba kwa musango yu kulangilila ukuti Lesa fye eka e wingalenga ubutumikishi bwesu ukuletako abasambi.—1 Kor. 3:5-7.
5 Nkashi umo aletontonkanya ukuti umwanakashi aletwalila bamagazini talebelenga Ulupungu lwa kwa Kalinda na Loleni! Apo talefwaya ishi mpapulo shishaiwamina ukulaonaika fye, apaapaatile Yehova ifyo nga ca kuti uyu mwanakashi tabelenga ishi mpapulo, alekana ukushipoka. Lintu nkashi abweleleko umuku wakonkelepo, umulume wa uyu mwanakashi atile: “Ndetasha pa kuleta aba bamagazini lyonse. Ndababelenga kabili nalibatemwa icine cine.”
6 Mu kuicefya kabili mu kubilima kuti twapaapaatila Yehova ukutwafwa ukwishiba ifya kucita ilyo abengi bashileyangwako ku cine na lintu batupumya, kabili kuti twapepa ukuti twilatiina abantu ku kuleka tutwalilile ukushimikila bambi mu kushipa. (Imil. 4:31) Nga ca kuti twatwalilila ukupepa ‘amapepo aya musango onse pamo na ya kupaapaata’ ilyo mu cumfwila tulebomba umulimo wesu uwashila, kuti twashininkisha ukuti Yehova akatwafwa.—1 Yoh. 3:22.