Bushe Mwalilembesha Ubwingi bwa Bamagazini Mulefwaya Ukulapokako?
1 Apo nomba takuleba ukulipilisha pa mpapulo, cakulaba shani pa kupoka bamagazini ku cilonganino? Tacifwile ukuba ati uwafika bwangu apo batantika bamagazini no kupoka e ufwile ukubalilapo. Twakambishiwa ukuti “fyonse ficitwe busaka busaka kabili mu kukonkana.” (1 Kor. 14:40) E ico, bushe twakulakonka imitantikile nshi pa kuti takuleba icimfulumfulu atemwa ukupusulwa? Ibukisheni ukutubulula kwali mu ca mu kati mu Ubutumikishi Bwesu Ubwa Bufumu ubwa September 1995 pa lyashi lyaleti: “Bomfya Bamagazini Besu Bwino nga Nshi.” Catukoseleshe ‘ukukwata orda washininkishiwa uwa Magazini,’ kabili calondolwele ukuti: “Lembesha bamagazini ulefwaya ukulapokelela kuli munyina uubombela kuli bamagazini pa kuti ukakwate impendwa ya makope iyashininkishiwa iya lwafuma lumo na lumo. Muli iyi nshila, iwe no lupwa lobe mukalakwata bamagazini lyonse kabili abakumanina.” Bushe e fintu mwacita?
2 Lintu bamagazini bafika pa cilonganino balingile ukwananishiwa shani? Umubomfi wa magazini akulapeela kasabankanya ukulingana no bwingi bwa bamagazini alembeshe. Baeluda bafwile ukweba bakasabankanya ifyo tabafwile ukusenda bamagazini ukucila pa mpendwa baipwishe pantu ukucita ifyo kukalenga bambi ukupusulwa. Nga ca kuti mu kupita kwa nshita umo afwaya ukulundako atemwa ukucefyako impendwa ya bamagazini kuti aeba umubomfi wa magazini ukucite fyo. Umubomfi wa magazini na o akalundako nelyo ukucefyako impendwa ya magazini icilonganino cipokelela ukufuma ku Sosaite. Ibukisheni ukuti palapita imyeshi itatu pa kuti ukuteuluka konse kupwishishiwe. Nga ca kuti muli no kuyapo kumo pa nshita yalepa, ishibisheni umubomfi wa magazini ukuti akalepeela bamagazini benu kuli bakasabankanya bambi ukufikila lintu mwabweluluka.
3 Sosaite ilefwaya kasabankanya onse uwaishiba ukubelenga na bana bakwe ababelenga ukukwata magazini wa Ulupungu lwa kwa Kalinda. Apantu twalikwata Loleni! mu Cibemba kuti mwasendako magazini umo pamo ngo lupwa. Kabili mufwile ukwishiba impendwa ya bamagazini imwe no lupwa lwenu mukabila mu butumikishi. Nga cabe fyo ninshi baeluda tabakaletunganya impendwa ya bamagazini icilonganino cilingile ukuorda lelo bakasansha fye impendwa ya magazini cila umo umo alefwaya pa kuti mwingasanga icipendo calungama. E co twamukoselesha ukulembesha orda wa bamagazini mulefwaya ukulapokelela. Umubomfi wa magazini akalemba amaorda yonse no kuyasansha pamo. Pa kuorda kuti mwapushamo impendwa ya bamagazini abo mukalapeela abalesekelela abashalembesha. Ici cikalenga uuli onse ukupokako magazini lyonse ukwabula ukulanguluka ukuti bambi bakapwisha bamagazini bonse e lyo bena ukushalapo fye.