Isukulu lya Butumikishi bwa Teokrasi mu 2001
1 Kwaliba imilandu iingi iya mu Malembo iyo ifwe bonse tulingile ukulalandila amalyashi mwi Sukulu lya Butumikishi bwa Teokrasi.—Amapi. 15:23; Mat. 28:19, 20; Imil. 15:32; 1 Tim. 4:12, 13; 2 Tim. 2:2; 1 Pet. 3:15.
2 Programu wa kubelenga Baibolo cila mulungu aba lubali lwa kale ulwe sukulu. Ilingi line kuba ukubelenga ibula limo ilya Baibolo cila bushiku. Ukutendeka uno mwaka, ukubelenga Baibolo kwakulaba na mu mulungu wa kupitulukamo kwa kulemba. Ukubelenga Baibolo ukwalundwapo ukwalebako imyaka itatu iyapita kwapwa. Lelo nga mulefwaya ukubelenga Baibolo ukucila pa fitantikwe, kuti mwapanga programu wenu uwa kubelenga Baibolo.
3 Ilyashi Na. 2 likansha bamunyina mu “kubelenga kwa pa cintubwingi” ukwa Cebo ca kwa Lesa. (1 Tim. 4:13, NW) Ilyo bamupa ilyashi lya kubelenga, pitulukenimo libili libili kabili ikatisheni ishiwi pa kubelenga. Kuti mwanonkelamo mu kukutikisha ku baishiba ukubelenga ku kuwamyako ukulumbula kwa mashiwi, iciunda, ne mbali shimbi isha kubelenga kusuma.
4 Amalyashi Na. 3 na Na. 4 yakulafuma mu citabo ca Ukupelulula, icapekanishiwe ukulabomfiwa mu butumikishi bwa mwi bala. Nga ca kuti ifyebo mupeelwe te kuti mufilande fyonse mu nshita mupeelwe, saleni fye ifingabomba mu ncende iyo icilonganino cenu cibombelamo. Imitantikile yonse iingaba iyalinga mu ncende icilonganino cibombelamo kuti yabomfiwa.
5 Esheni na maka yonse ukulanda amalyashi yonse mu sukulu. Mulepekanya bwino, no kulanda ukufuma pa mutima wenu. Mwakulakoselesha icilonganino, kabili mukasangamo ubusuma mu kulanda amalyashi no mweo onse mwi Sukulu lya Butumikishi bwa Teokrasi mu mwaka wa 2001.