“Beni Aba Mushilo”
1 “Uwa mushilo kuli Yehova.” Aya mashiwi ya kucincimusha yalebikwa apa kuti bonse baleyamona, kabili yaleshilwa pa kapapatu ka golde uwalopolwa akalekakilwa ku citebo calefwala shimapepo mukalamba uwa mu Israele. (Ukufu. 28:36-38) Aya mashiwi yalecinkulako abantu ukuti ukukanapala inko ishisenshi ishalepepa tulesa twakowela, Israele alepepa Lesa wasanguluka kabili uwa mushilo.
2 Mu mafunde ya kwa Lesa ayapeelwe kuli Mose mwali ifipoope ifyasosele ukuti abantu bakwe bafwile ukuba aba busaka lwa ku mubili na lwa ku mupashi. Ici e capaatwileko Israele no kumulenga ukuba uluko lwa mushilo. Ubu busaka bwalecindika Lesa kabili bwalengele no kuti uluko luleba no bumi ubusuma.—Lebi 11:35, 36; 15:1-11; Esa. 52:11.
3 Yehova enekela abamupepa ukulamona ubusaka filya fine umwine abumona. Umutumwa Petro apuutilwemo ukulemba ukuti: ‘Filya uwamwitile abo washila, e fyo na imwe mube abashila mu mibele yenu yonse; pantu calembwa, aciti, Beni aba mushilo; pa kuti ine ndi wa mushilo.’ (1 Pet. 1:15, 16) Cinshi cipilibula ukuba aba mushilo? Muli Baibolo ica mushilo cintu ‘icabengeshima, icipya, icishakowela, kabili icasanguluka.’ Mose alondolwele ukuti Yehova aba uwa busaka nga nshi, takowela, tatekelesha ubusali nangu panono.—Haba. 1:13.
4 Ubusaka ni cimo icishibisha abantu ba kwa Yehova. Yehova alacindikwa ilyo abantu ba busaka balemupepa. Bushe Lesa uushitekelesha nangu panono ubusali kuti apokelela ukupepa kwa basali kabili abashapempenkana? Te kuti tupeele na Lesa umulandu pa kukaanya abasali ba musango yo ukwingila muli paradise wakwe uuleisa uwa busaka kabili uwayemba. Kuti basafya paradise no kuikowesha, kabili tafwaya ica musango yo. Lesa wa busaka kabili uwa mushilo apokelela fye ukupepa kwa bantu ba busaka kabili aba mushilo! Ibukisheni ukuti atile ‘Beni aba mushilo; pa kuti ine ndi wa mushilo.’
5 Imibili, ifya kufwala, amayanda no lubansa ifya busaka fyaba lubali lwa kupepa kwesu. Ifiine fyeka filashimikila. Fibako pa mulandu wa kufwala ubuntu bupya. (Kol. 3:9, 10) Abantu ba busaka benekelwa ukuba na mayanda ya busaka kabili ayapempenkana ukusanshako ne fifulo fyabo ifya kupepelapo pamo pene ne fifulo fya mabungano. Pa kuti ici cingacitwa, kapepa umo na umo lyonse akabila ukuba uwaibukila pa lwa busaka no kupempenkana. Nakaana nga te ifyo, Yehova atila ali ‘no kubwela mu kutukonka.’—Amala. 23:14.
6 Ukuba Aba Busaka pa Mabungano Yesu: Ilingi line bamunyinefwe balabomba nga nshi ukuwamya ubusali ubo aba ku calo basha bapoosaika fye mu fibansa fya mangalo ifyo twashima. Aba ku calo tabasakamana na fintu cilambile, kabili tabatontonkanya ukuti abantu bakaculilapo ukuwamya ifiko ifyo basha. Bushe kuti twaenekela bakapepa ba kwa Yehova ukuba muli uyo musango? Ico cipusho calyasukwa pali Malaki 3:18 apatila: “E lyo mukabwela no kumona apalekene . . . uubombela Lesa no ushimubombela.” Pafwile pabako ukulekana nelyo ubupusano ubwingamonwa bwino bwino kuli bonse. Ukuba aba busaka nga Yehova kulatupaatulako. Ubusaka lubali lwesu ulwa kupepa.
7 Ilyo tukalafika pa fifulo fyesu ifye bungano tatuleenekela ukusangapo ifisooso, amapepala, bapulastiki, utupendo no busafya bumbi pa nshi. Mulandu nshi? Pantu tubekelwa mu kukwata ififulo fya mabungano ifya busaka. Ifilonganino filawamya icifulo ce bungano ilyo tushilafika, kabili tulatasha nga nshi pali ico. Bonse kuti twacitako fimo ku kufisunga ifya busaka pa kutoola ifisooso fyesu no kusambilisha abana besu ukukanapoosa ifisooso icipoosepoose. Takufwile ukuba bamunyina bacaice abalepitana mu cibansa baletoola ifisooso ifyo ifwe tupoosele. Umo umo ali no kusenda icipe cakwe umwine no kucankilwa mu cifulo ce bungano ica busaka icikacindika Yehova, Lesa wesu uwa busaka. Dipartmenti wa busaka alingile ukushininkisha ukuti ing’ungulu ishingi e ko shili na masaka umo bamunyina bengalapoosa ifisooso. Amabotolo tayalingile ukulambalikwa pa nshi. Nga ca kutila twaciyafumya kwi tuuka, tulingile ukuyabwekeshamo uko kwine. Lapeni ukuti imwe na ba mu ng’anda yenu tamwakapoosaike fisooso, pa ng’anda pa mwenu, mu misebo, kabili maka maka pa Ng’anda ya Bufumu atemwa pa cifulo ce bungano. Nga tulefwaya ububile bwa kwa Yehova tulingile ukuba aba busaka inshita yonse.
8 Mwe bakwata amayanda nelyo ifipaka pa cifulo ce bungano, shininkisheni ukuti incende mupepi na imwe ili iya busaka. Mufwile ukupoosa ifisooso apo abaleteyanya ukulongana basala. Nga mwacita ifi bonse mu lupwa kuti bacindika Yehova.
9 Pa mabungano ayengi ku fimbusu kulaba ubwafya. Filalamba nga nshi ica kuti abantu balafilwa no kuyako. Takuli nangu umo pali ifwe uwatemwa ukuya mu cimbusu ca busali. Bonse balingile ukwesha sana ukusunga ifimbusu ifya busaka. Abakalamba bafwile ukushindika abana banono ku cimbusu no kuciwamya bwino bwino ilyo abana bapwisha ukucibomfya. Dipartimenti wa busaka alingile ukushininkisha ukuti nababikako ica kuwamishako ku milomo ya cimbusu ca kwimba. Tulingile ukusamba ku minwe pa numa ya kuya ku cimbusu. Cilakosa sana ukukanaposha umuntu uwatambulula ukuboko kwakwe kuli ifwe ilyo twishibe ukuti tasambile ku minwe pa numa ya kufuma ku cimbusu. Icimbusu ca kwimba cimo na cimo cilingile ukukwata iciibi pa mwinshi ku kucindikako abaleyamo. Kufwile kwaba impemba nelyo umucanga lwa mupepi. Bamunyina na bankashi abashintililwapo kuti bapeelwa umulimo wa kuwamya ifimbusu. Tulingile ukuitemenwa ukubomba umulimo wa kuwamya ifimbusu no kufisunga ifya busaka. Nangu ca kutila uyu mulimo umoneka uwa pa nshi, ulakabilwa nga nshi pe bungano, ‘ilyo tulecitila bambi ifyo twingafwaya bene ukutucitila.’ Tatufwile ukusunsumana ku nse no kusha ubusali ubushashiikwa. Ici cilakalifya Yehova na bamunyinefwe kabili kuti caleta amalwele ne mfwa.—Belengeni Amalango 23:12-14.
10 Ifi fyebo fyaba lubali lwa kukanshiwa kwesu ukutupekanishisha ku mikalile ya mu calo cipya kabili bakapepa ba kwa Yehova bonse bafwile ukufikonka. Yehova atile, “Bakalenge abantu beshibe ukupaatulanya pa kati ka fya mushilo ne fyayanguka, no kubalenga beshibe ukupaatulanya pa kati ka fyakowela ne fyasanguluka.”—Esek. 44:23.
11 Abalefwaya ukuteemuna Lesa besha na maka yonse ukwikala umwabela ififwaikwa fya kwa Kabumba pa lwa busaka. Ici kuti cafwaya ukwalula imintontonkanishishe yesu. Fwe bengi tulecita bwino sana muli ci no kumona twalimona ubusuma bwa kuba aba busaka. Tulemutasha. Shi natutwalilile ukuba no busaka pa mayanda no kukansha abana besu ukulacitako fimo pa kusunga ing’anda iya busaka. Lyene cikatwangukila ukuba no busaka pa Ng’anda ya Bufumu na pa mabungano, pantu cikaba cintu tucita lyonse, e kutila yaba mikalile yesu iya Bwina Kristu. Bonse tulingile ukufwaisha ukuba aba busaka kabili abapempenkana. Mulandu nshi? Pantu tulefwaya ukuba aba mushilo ukupashanya Lesa untu tupepa.