Umukululo wa Fipusho

◼ Bushe caliba fye bwino ukwimba inyimbo sha kale ishishaba mu citabo ca Imbileni Yehova Amalumbo?

Mu 1966 ilyo icitabo ca nyimbo ica ciNgeleshi ica “Muleimba no Kuisanshamo Mwe Bene ne Ciunda Cisuma mu Mitima Yenu” cafumine, Ulupungu lwa kwa Kalinda, ulwa mu ciNgeleshi ulwa May 15, 1966, pe bula 315, lwalandile ukuti: “Inyimbo shonse ishaishibikwa ukuti shafumine kuli Babele Mukalamba nashifumishiwamo, kumo fye ne nyimbo shimo ishashelemo isha kale sana kabili ishapalanako ne sha ku calo. . . . Ukwabula no kutwishika, inyimbo shimo isho abengi batemenwe sana nashifumishiwamo; lelo kuti cawama nga twaibukisha ukuti amashiwi e yalenga ukuti inyimbo shili mu citabo shibe isha kulumbanya Yehova kabili kuti cawama amashiwi tayapalene na ya ku calo nelyo aya mipepele imbi. Nomba inyimbo shesu tashipaleneko ne sha bambi. Nga mwaumfwa ‘Ulwimbo lwa Bufumu,’ mufwile ukwishiba ukuti ca cine lwa Bufumu!”

Mu 1995 icitabo cipya ica Imbileni Yehova Amalumbo califumine mu Cibemba, na mo mwine mwali ukuwamyako inyimbo na kumbi. Bonse tulekoseleshiwa ukusambilila no kwimba ishi shine nyimbo shipya. Te kuti cibe bwino ukulaimba inyimbo sha kale ishishaba mu citabo cipya. Tatufwile ukusambilisha abana nelyo abapya inyimbo sha kale kabili tatufwile ukwimba shene pa kulongana konse ukwa Bena Kristu nelyo fye pa kubungana kumbi ukwa kwangala fye.