Umukululo wa Fipusho

◼ Cinshi Umwina Kristu engacita nga afilwa ukusanga uwa kuupana na o uwalinga?

Abengi balisanga insansa shine shine mu bushimbe ilyo balebombela Lesa. (Mat. 19:11, 12; 1 Kor. 7:7) Lelo, bamo abafwaisha ukuupa nelyo ukuupwa bailenga ukobelwa sana muli ci cintu. Basuka bafika na ku kulemba mu nyunshipepala ukuti balefwaya uwa kuupa nelyo uwa kuupwako. Bushe ici cisuma?

Apo Yehova e Katendeka wa cupo, afwile alibikako ne fya kukonka pa kwishishanya pa kutila ifintu fiwame. Amashiwi ya kwa Paulo ku babomfi ba kwa Lesa abaipeela ya kuti bafwile ukutontonkanya pa kuupila nelyo ukuupilwa “muli Shikulu epela.”—1 Kor. 7:39.

Apo twalikwata amano, tatufwaya ukwangusha ukwishishanya nge fyo abengi bakwangusha. (1 Kor. 15:33; Amapi. 10:23) Bushe kwena kuti cabamo amano ukwipusha uwa ku calo ukutufwaila uwa kuupa nelyo ukuupwako uo twishibe no kuti tatutemwa, taishiba ne fyo tukabila kabili uwaiminina fye pa kupanga indalama?

Ukulemba mu nyunshipepala kuti kwatulenga twaishibikwa na kubashilingile ukwishibikwako no kutuletela fye amafya yabulo kwenekela. Kuti kwalenga bambi, na baice bene, ukuluba no kusondwelela ati twaba fye cimo cine na bena fyalo mu kwishishanya musango yu, ukulenga batendeka ukufwaya abantu abashakwata imibele ya musangwela iyo twakwata, napamo no kubaletela ubwafya.—Ukute. 34:1, 2; Amapi. 22:3.

Abena Kristu bamona ukuti abaleishishanya ninshi balesungamina ukuupana. Ukupanda amano kusuma pali iyi milandu yacindama, ukufuma ku bantu abatufwaila ubusuma lwa ku mubili na lwa ku mupashi, kuti kwasangwa mu kuteyanya kwa cilonganino te mu mikululo ya mu nyunshipepala iyo.—Amalu. 119:9; Esa. 32:1, 2; Tito 2:3.