Ukusekelela pa Kwikatana na Yehova no Mwana Wakwe
Ukusefya Kukalamba Ukwa pa Mwaka Kukabako pa March 28
1 Ukusefya Umulalilo wa kwa Shikulu cilya akasuba kawa pa March 28, 2002, kukalanga ukuti tulasekelela pa kwikatana twaikatana na Yehova Lesa na Yesu Kristu. Ubu bwine bushiku bwaibela, Abena Kristu basubwa abashalapo bakaipakishe “senge” lyaibela ilyo bakwata ne mpyani sha Bufumu shimbi, na Wishi, no Mwana wakwe. (1 Yoh. 1:3; Efes. 1:11, 12) Imintapendwa ya “mpaanga shimbi” baketetula pe shuko bakwata ilishaiwamina ilya kwikatana na Yehova no Mwana wakwe, ukuba no mutima umo no muntontonkanya umo wine uwa kupwisha umulimo wa kwa Lesa!—Yoh. 10:16.
2 Ukubombela Pamo mu Kwikatana: Yehova na Yesu lyonse balasekelela pa kubombela pamo mu kwikatana. Baliipakishe ukubombela pamo pa myaka iingi ilyo bashilabumba umuntu. (Mika 5:2) E co bali abatemwana nga nshi. Apo ali mano yaleimininako umuntu ilyo ashilaba umuntunse, uyu Mwana ibeli atile: “Nali mupepi na kuli wene [Yehova], umwana wa kulelwa, nali ica kupekelwa cakwe ubushiku no bushiku, uwaleangala ku cinso cakwe mu nshita shonse.” (Amapi. 8:30, 31) Ukuipakishe senge line line ne Ntulo ya kutemwa pa myaka iingi kwakumine ubumi bwa Mwana wa kwa Lesa!—1 Yoh. 4:8.
3 Ilyo amwene ukutila abantunse balekabila icilubula, Yehova asalile Umwana wakwe uwafyalwa eka, uwatemenwe sana abantunse, ukupeela ilambo lya cilubula, ilitupeela isubilo limo fye twakwata. (Amapi. 8:31) Filya fine Yehova aikatana no Mwana wakwe pa kufishapo ubufwayo bumo, e fyo na ifwe tutwalilila ukwikatana na bene e lyo no kutemwana nga nshi fwe bene ilyo tulecita ukufwaya kwa kwa Lesa no kusekelela.
4 Ukulanga Ukutasha kwa pa Mutima: Nga twasangwa ku Cibukisho, twakutikisha mucinshi mucinshi, tulanga ukutasha kwine kwine pa fyo Yehova atutemwa na pe lambo ilyo Umwana wakwe atutuulile. Icikakomailwapo ca kumwenako cisuma ica kwa Yesu, bucishinka bwakwe mpaka ne mfwa pa kututulila ilambo, ukuteka kwakwe nge Mfumu ya kwa Lesa iya Bufumu bwapampamikwa, na mapaalo ayo Ubufumu bukaletela abantunse. Kabili tukacinkulwako pa lwa bucindami bwa kuba ne citetekelo lyonse, ukuba abapimpa pa kubombela pamo na Yehova ukucita ukufwaya kwakwe nga ‘babombela pamo ne Cine.’—3 Yoh. 8; Yako. 2:17.
5 Ukwaafwa Bambi Ukusefya na Ifwe: Ibumba lya baeluda lilingile ukubombesha ku kwaafwa baNte bonse abanaka ababa mu cifulo mushimikila ukusangwa ku Cibukisho ca mfwa ya kwa Kristu. (Mat. 18:12, 13) Lembeni amashina ya bantu mulefwaya ukulaalika pa kuti mwishapo nelyo umo kabili shininkisheni ukuti bonse balaalikwa.
6 Bushe mwalishibako bamo abengesa ku Cibukisho? Imineni mwe bene no kuyabakoselesha ifyo bengamwenamo ukusefyako Icibukisho. Cincimukeni pa kubalaalika, kabili balengeni ukumfwa ukuti na mubasengela. Natubombeshe ukwita bonse abo tusambilila na bo Baibolo na bafwaya ukusambilila, ne ndupwa shesu shine e lyo ne fibusa pa kuti bakasangweko kuli uku kusefya kwacindama mu mwaka. Bonse abasambilila pa lwa “cuma icapulamo ica kwishiba Kristu Yesu” bakamwenamo mwi lambo. (Fil. 3:8) Bonse abatetekela mwi lambo lya kwa Kristu kuti baba ne subilo line line ilya mweo wa muyayaya.—Yoh. 3:16.
7 Mwiesha ukutontonkanya ukutila Icibukisho teti cafwe abafumaluka. Papita imyaka ibili apo abalefwaya ukusambilila 11 abekala mu calo ca Papua New Guinea icaba pa cishi, baendele no bwato amaawala 17 pali bemba walulunkana pa kuti fye basangwe ku Cibukisho. Cinshi bailile? Batile: “Twalefwaya ukusefya Icibukisho ca kwa Kristu na bakapepa banensu aba kwa Yehova, kanshi cali fye bwino ukuti tuye.” Tontonkanyeni pa kupimpa kwa balya balefwaisha ukusambilila kabili tontonkanyeni na pa kutasha kwabo ne fyo basekelela pa kwikatana na Yehova, Umwana wakwe, na bamunyinabo aba Bwina Kristu!
8 Ebeni bonse abengatemwa ukusambilila ukuti mulesambilila nabo Baibolo. Bakoselesheni ukusangwa ku kulongana kwa cilonganino lyonse no kwebako bambi pa cine ico balesambilila. Bafweni ‘ukwenda mu lubuuto’ no ‘kucita icine’ pa kulabomfya ifishinka fya mu Baibolo mu mikalile yabo. (1 Yoh. 1:6, 7) Bafweni ukuba ifibusa fine fine na Yehova no kutwalilila ukucindamika ishuko lya kuba abaikatana mu kucita ukufwaya kwakwe.
9 Mwandi lishuko likalamba ukuba abaikatana kabili abasekelela no “mutima umo, abakoshanya umutima umo ku citetekelo ca mbila nsuma.” (Fil. 1:27, 28) Natufuluke ukubishanya kusuma ukukaba pa Cibukisho pa March 28, natuletasha lyonse kuli Yehova no Mwana wakwe!—Luka 22:19.