Kalata Ukufuma Kwi Bumba Litungulula
Ilyo tuletendeka imyaka ya kubalilapo iya mwanda wa myaka uwalenga 21, ca kusekelela ukumulembela mwe “ba bwananyina” ba mwi sonde lyonse, no kumutasha pa fyo mubombesha. (1 Pet. 2:17) Imyaka nalimo 2,000 iyapita, Yesu aipwishe ati: “Umwana wa muntu ilyo akesa, bushe akasange citetekelo pano nse?” (Luka 18:8) Pa kubombesha kwenu mu mwaka wa mulimo wapwile, mwayasuka icipusho ca kwa Yesu mu kupongomoka ukuti ee! Bamo muli imwe balipontelwa no kupumiwa pa citetekelo cenu. Mu ncende ishingi, mulashipikisha nangu kuli inkondo, utuyofi, amalwele, nelyo ifipowe. (Luka 21:10, 11) Pa mulandu wa kupimpa kwenu ku kucita imilimo yalungama, Yesu kuti ‘asange citetekelo pano nse.’ Cine cine ku muulu kulaba ukusekelela pa mulandu wa ico!
Twalishiba ukuti ukushipikisha takwayanguka. Tontonkanyeni pa mesho ya bamunyinefwe mu calo cimo ku masamba ya Asia. Ukusansa Inte sha kwa Yehova kwaliseeka muli ici calo. Nomba line fye, bakapokola bapumfyenye ukulongana kwa mutende ukwa bantu nalimo 700. Bakapokola bacilike imisebo balengele bambi 1,300 ukukanasangwako. Ibumba lya bantu bafwele ifya kuifungushanya ku menso, bamo abali ni bakapokola, baishile apabelele ukulongana, baumine abengi abasangilwepo, no koca icikuulwa cali no kubomfiwa ku kulongana. Inshita shimbi, abapimpila imipepele baloma bamunyinefwe icabipisha ku nkonto shakwata imisomali.
Ukusansa kwa musango uyu kwalibipa lelo takupapusha. Umutumwa Paulo apuutilwemo ukulemba ati: “Bonse abalefwayo kwikala umwabela bukapepa muli Kristu Yesu bakapakaswa.” (2 Tim. 3:12) Mu mwanda wa myaka uwa kubalilapo, Abena Kristu bashipikishe ukubapumya no kubapakasa, kabili bamo balipaiwe no kwipaiwa. (Imil. 5:40; 12:2; 16:22-24; 19:9) E fyo cali na mu mwanda wa myaka uwalenga 20, kabili tatuletwishika ukuti e fyo cikaba na mu walenga 21. Nalyo line, Yehova atweba ati: “Icilwilo conse icafulilwa iwe tacakashuke.” (Esa. 54:17) We bulayo ubusuma! Ca cine, twalicindama nga nshi kuli Yehova ica kuti alandile muli kasesema Sekaria ati: “Uwakumya pali imwe, akumya pa mboni ya linso lya kwa Yehova.” (Seka. 2:8) Abalwani ba bakapepa ba kwa Yehova tabakabale abacimfya. Ukupepa kwa cine kukacimfya!
Ku ca kumwenako, mu calo twacilandapo pa muulu, Inte sha kwa Yehova baingilishiweko imiku ibili impendwa ipya iya bakasabankanya mu mwaka uwa mulimo wa 2001. Ca cine, bamunyinefwe kulya balashipikisha nangu kuli amafya, nge fyo bacita mu ncende shonse. Mu mwaka wa mulimo uwapwile, mu calo conse kwaleba abantu 5,066 abalebatishiwa cila mulungu ku kulanga ukuipeela kwabo kuli Yehova. Nomba aba bapya, pamo na ifwe bonse, bapampamine pa ‘kwiminina abapwililila kabili [abashininkisha, NW] muli conse ico Lesa afwaya.’—Kol. 4:12.
Kabili tontonkanyeni pa fyacitike nomba line mu Greece. Nangu ca kuti Inte sha kwa Yehova balebakaanya icabipisha ku ba mwi calici lya Greek Orthodox Church, nomba balisuminishiwa ku buteko ukuti “mipepele yaishibikwa.” Icalembwa icilanga ukuti balishibikwa kabili citila Bethel ya ku Greece “cifulo icashila kabili icashishiwa, icapeelwa ku kupepa Lesa.” Kabili tuli aba nsansa ukumweba ukuti mu mwaka wa mulimo uwapwile, ifilye fyapingwile bwino imilandu yakumine ukupepa kwesu mu Bulgaria, Canada, Germany, Japan, Romania, Russia, na mu United States. Ala tulatasha Yehova pa kutwalilila ukwisula umwinshi wa kubombesha muli ifi fyalo!
Ilyo tuletontonkanya ifyo Yehova atungilila abantu bakwe muli ishi nshiku sha kulekelesha, tulamona ukuti e Cibusa wawamisha twakwata. Tulabekelwa muli bucibusa bwesu na o, ukwishiba ukuti alitutemwa, alatusambilisha, kabili alatulungika. Ca cine ukuti tukatwalilila ukuba na mesho ya citetekelo. Lelo icitetekelo cakosa muli Yehova cikatwaafwa. Yakobo alembele ati: “Ca kusekelela fye, mwe bamunyinane, ilintu mwawila mu fya kwesha fya misango misango, pa kwishibo kuti ukulabulwa kwa citetekelo cenu kucito kushipikisha.” (Yako. 1:2, 3) Kabili ukushipikisha kwesu kulanga ukutemwa twatemwa Yehova, kabili ici cituletela ukusekelela kukalamba! Bamunyinefwe, ishibeni ukuti Yehova akatwafwa umo umo. Nga twatwalilila aba cishinka, akatwafwa ukwingila mu calo cipya. Afwaya tutunguluke.
E ico, tulecincisha imwe bamunyinefwe ne nkashi, abaice na bakalamba, ukulaibukisha amapaalo yakalamba ayali ku ntanshi. Shi natube ngo mutumwa Paulo, uwalembele ati: “Pantu ndetila ubucushi bwa nshita ino tabuyene ukulingwa ku bukata ubukasokololwa kuli ifwe.” (Rom. 8:18) Shintilileni pali Yehova ilyo muli na mafya ya musango onse. Shipikisheni, kabili mwinenuka. Tamwakabale amuba na malangulushi nga mwacita ica musango yo. Icebo ca kwa Lesa citweba ukuti: “Uwalungama akabelo wa mweo mu cishinka cakwe.”—Haba. 2:4.
Ni fwe bamunyinenwe,
Ibumba Litungulula ilya Nte sha kwa Yehova