Ikusheni Ukukabila Kwenu Ukwa ku Mupashi
1 Ibungano lya Citungu ilileisa ilya “Bakabila ba Bufumu Abapimpa” likatupeela ishuko lyaibela ilya kwikusha ukukabila kwesu ukwa ku mupashi. Nga filya fine tuipakisha ifya kulya fisuma, e fyo na programu akatunonsha lwa ku mupashi ne “fyebo fya citetekelo.” (1 Tim. 4:6) Programu akatwafwa ukupalama kuli Yehova. Kabili kuti twaenekela ukufundwa no kukoselesha ifikatwafwa ukushipikisha amesho mu mikalile yesu. Yehova atulaya ukuti: “Ndekushilimuna, kabili ndekulange nshila iyo ufwile ukwendamo; ndekupanda amano na menso yandi pali iwe.” (Amalu. 32:8) Mwandi twalipaalwa pa kutupeela ubutungulushi bwakwe ubusuma mu mikalile yesu! Moneni ifintu fimo ifyo twingacita pa kuti twingamwenamo sana muli programu we bungano.
2 Tufwile Ukuteyanya Umutima Wesu: Cila muntu pali ifwe alikwata umulimo wa kucingilila umutima wakwe uwa mampalanya. (Amapi. 4:23) Ico tukabila ca kuti tuleilama no kuba na bucishinka fwe bene. Inshita ye bungano ni nshita ya kwetetula pali bucibusa bwesu na Yehova, iba ni nshita ya ‘kulolesha mu malango ayatuntulu aya buntungwa.’ Pa kuteyanya umutima wesu ‘ukupokelela icebo calimbuka,’ tufwile ukulomba Yehova ukutuceeceeta, no kumona muli ifwe “imibele ya bubi” iili yonse iilingile ukulungikwa, no kututungulula mu “nshila ya muyayaya.”—Yako. 1:21, 25; Amalu. 139:23, 24.
3 Kutikeni no Kwetetula: Yesu atashishe Maria pa kwangwa ku mashiwi yakwe, atile: “Maria nasalo mulumbo usuma uushakapokwe kuli wene.” (Luka 10:39, 42) Na ifwe nga twaba no muntontonkanya umo wine, tatwakaleke utuntu utunono ukutupumbula. Tukashininkisha ukuti natwikala no kupoosako amano inshita ya programu yonse. Tatwakalelanda nelyo ukwendaenda kabili tukasakamana ukuti tatupumfyenye bambi na mafoni ya kwenda na yo, amapeja, bakamera, na bakamera bakukopa amavidio.
4 Ilyo tulekutika ku malyashi, cisuma ukulembako ifyebo ifinono ifya kutwafwa ukubebeta ifyo ilyashi lilelandwa. Tufwile ukwampanya ifyo tuleumfwa ku fyo twaishiba kale. Ici kuti catwafwa ukumfwikisha no kusunga ifyebo. Ilyo tulepituluka mu fyo twalembele, tufwile ukulatontonkanya pa fyo twingabomfya ifyo fyebo. Cila muntu pali ifwe afwile ukuipusha ati: ‘Bushe ici cikumine shani bucibusa bwandi na Yehova? Finshi ningile ukwalula mu mikalile yandi? Kuti nabomfya shani ifi fyebo ilyo ndebomba na bambi? Kuti nafibomfya shani mu butumikishi bwandi?’ Lanshanyeni na bambi ifishinka ifyo maka maka twacitemwa. Ukucita ifi fintu ku katwaafwa ukusunga ifyebo fya kwa Yehova ‘mu kati ka mutima wesu.’—Amapi. 4:20, 21.
5 Natucite Ifyo Tusambilila: Pa numa ya kusangwa kwi bungano lya citungu, umo atile: “Programu acilalanda fye pali bonse, ukulenga cila muntu ukuceeceeta umutima wakwe ne mitima ya baba mu lupwa lwakwe, kabili acilapeela ubwafwilisho bwa mu Malembo ubusuma ubo tukabila. Nanenga ukulundapo ukutesekesha umulimo wandi uwa kwaafwilisha nga nshi icilonganino.” E fyo ne cinabwingi cesu twayumfwile. Lelo lintu twafuma pe bungano tatufwile ukupelela fye pa kuyumfwa ukuti natukoseleshiwa no kupembesulwa lwa ku mupashi. Yesu atile: “Nga mwaishibe fintu ifi, ninshi mwalishuka nga muleficita.” (Yoh. 13:17) Tufwile ukwangwako sana ukubomfya ifishinka fingabomba kuli ifwe. (Fil. 4:9) Ici e cingatwafwa nga nshi ukwikusha ukukabila kwesu ukwa ku mupashi.
[Akabokoshi pe bula 5]
Etetuleni pa Fyo Muumfwa:
■ Bushe ici cikumine shani bucibusa bwandi na Yehova?
■ Bushe cakuma shani ifyo momba na bambi?
■ Bushe kuti nabomfya shani ici mu mikalile yandi no butumikishi?