Kalata Ukufuma kwi Bumba Litungulula
Bamunyina na bankashi batemwikwa,
TWATEMWA nga nshi ukumulembela! Tulemutasha pa kutwalilila ukulanga ukutemwa na pa kutwalilila ukuipeelesha. Muli Yearbook ya uno mwaka muli no kumona ukuti kuli ifisuma ifingi ifyabombelwe mu mwaka wa mulimo uwapwile. Muli uyu mwaka na mo, twalibombele amaawala ukucila pali bilioni umo mu mulimo wa kushimikila no kusambilisha, ukulanda na bantu pa kanwa nkati ukubakoselesha ukupalama kuli Yehova. Bushe te mucinshi ukuba bakabomba banankwe aba kwa Lesa wesu uwa bukata kabili Shifwe wa ku muulu?—1 Kor. 3:9.
Ilyo twatontonkanya pa mulimo uli ku ntanshi, tulecetekela ukuti mukatwalilila ukupashanya ukupimpa ne citetekelo ca babomfi ba kwa Lesa, nga fintu calondololwa mu Baibolo. Ku ca kumwenako, umutumwa Paulo alefwaisha ukubombesha ukufika apo engapesha ukupakamisha ifya Bufumu. Cilemoneka kwati, cali mu mwaka wa kulekeleshako mu Efese e lyo alembele kalata wakwe uwa kubalilapo ku cilonganino ca Bena Kristu ica mu Korinti. Ilyo alelanda pa fyo alepanga ukucita ilyo line, alembele ati: “Ndeikala mu Efese kukasuke akuba umutebeto wa Pentekoste; pantu kuli ine nakwisukilo mwinshi uukalamba uwa kubombeshamo, lelo kuli abengi abalekaanya.”—1 Kor. 16:8, 9.
Paulo alepanga ukuya ku Makedonia na ku Korinti. Lelo, ailwike ukuti ali no kukwata ishuko lya kubomba umulimo wa kunonsha nga aikala mu Efese pa nshita yatantalilako. Paulo aleiteulula; amwene imibele isuma iyo engabombamo ku kutwala pa ntanshi ifya Bufumu pa kwikala uko kwine aali, ne co calengele aalule amapange yakwe no kwikala uko kwine aali. Umwinshi uukalamba uwa kubombeshamo waliswike kuli Paulo, kabili alefwaisha uku-ushukila no kwingilamo.
Pa kucite fi calekabila ukubombesha—ukushimikila imbila nsuma no kukuula icilonganino mu Efese. Inshita imbi, Paulo aebele abakalamba ba mu cilonganino ca muli ulya musumba ati: “Nshashimunwike ukumweba conse ica kumwafwa nangu ukumusambilisha pa bantu na ku ng’anda ne ng’anda. Lelo nashimikishe ubunte ku baYuda na ku baGriki ulwa kulapila kuli Lesa ne citetekelo muli Shikulwifwe Yesu.”—Imil. 20:20, 21.
Na imwe bene bamunyina ne nkashi bamo mwalishukila amashuko ayo mwamona. Mu mwaka wa mulimo uwapwile, bamunyina ne nkashi mupepi na 798,938 baliteulwile imibombele yabo pa kuti babombeko bupainiya bwapusanapusana. Bamo mwaliya ku mpela sha pano isonde ku kubomba nga bamishonari. Mulesalanganya imbila nsuma mu kupimpa no kukuula ifilonganino. Bamo aba imwe mwalisambilila ululimi lumbi pa kuti mwingaafwa abalanda indimi sha cilendo uko mwikala. Bambi na bo baliteulula imibombele yabo pa kuti babombe mu cifulo cishakwata aba kubombamo nelyo ukubomba ukuli ukukabila kukalamba. Bamo basanga no kuti umwinshi uukalamba walisuka pa sukulu, pa ncito, nelyo kumbi uko bengashimikila bwino, pamo nga pa telefoni. Ifya kukumanya ukufuma mwi sonde lyonse fyaba bunte bwa kuti abantu ba kwa Lesa, abaice na bakalamba, balefwaisha kabili balesanga amashuko ya kusambilisha icine ku bantu konse konse.
Ishibeni ukuti Yehova alamona imibombele yenu kabili alatasha icine cine. Baibolo itila: “Lesa tali uushalungama uwa kuti alabe umulimo wenu no kutemwa uko mwalangile kwi shina lyakwe.” (Heb. 6:10) Twalilileni ukuba abapempwila ukumona amashuko ayengalenga mwapakamisha ukupepa kwasanguluka. Bamo aba muli imwe kuti balundako ifyo babomba mu butumikishi. Ifwe bonse kuti twatukuta ukulenga ubutumikishi bwesu ukuba ubusandulula.
Lelo tatufishapo umulimo wesu uwa kushimikila ukwabula ukukaanya. Ibukisheni ukuti pa numa Paulo abe nalanda pa lwa mwinshi uukalamba uwa kubombeshamo uwaiswike kuli wene, alembele ati: “Kuli abengi abalekaanya.” Kuli Paulo, abalekaanya bali baYuda na Bena fyalo, bamo abalemusansa pa bantu na bambi balemupangila mu bucenjeshi.—Imil. 19:24-28; 20:18, 19.
Tulolenkana ne fyapalako ilelo. Ilyo tulepalamina ku bonaushi bwa buno bwikashi bubifi, tuleenekela ukuti ukukaanya kukafulilako. Satana aba ne “cipyu cikalamba,” kabili ico cipyu calungatikwa maka maka ku babombela Lesa. (Ukus. 12:12) Te kwesha ukulaba ukuti Satana e “kateeka wa pano calo.” Yesu aebele abasambi bakwe ati: “Amuba aba pano calo, aba pano calo nga batemenwe ababo bene. Nomba apo tamuli ba pano calo, lelo nalimusala mu ba pano calo, e co aba pano calo bamupatila.”—Yoh. 14:30; 15:19.
Twapampamina pa kukanaleka uuli onse ukutompola icitetekelo cesu muli Lesa nelyo ukutulenga ukunashako mu mulimo wa kushimikila imbila nsuma. Twalishiba ukuti kukaba abakatwalilila ukutusansa no kutupangila. Na lyo line, tulatwalilila ukushimikila imbila nsuma ya Bufumu mu kupambana, natucetekela no kucetekela ukuti Yesu akashonaula Satana ne bumba lyakwe mu nshita ya kwa Yehova iyalinga. Abalekaanya tabatalalike umutumwa Paulo; kabili tabatalalika ababomfi ba kwa Yehova ilelo. Te mulandu ne cipyu ca kwa Satana no lupato lwa cino calo, umupashi wa kwa Yehova ulebomba na maka pa kati ka bantu Bakwe. Fintu citusansamusha ukwishiba ukuti impendwa ya balebila imbila nsuma naifika ku cipimo cipya ica 6,304,645!
Tulepepa ukuti mutwalilile ukushukila amashuko ya kutwala pa ntanshi ifya Bufumu bwa kwa Yehova ubwapuulama. Ishibeni ukuti twalimutemwa pa lwenu umo umo ilyo tulebomba “no mutima umo” umulimo wa kwa Lesa Wapulamo, Yehova.—Sefa. 3:9.
Ni fwe bamunyinenwe,
Ibumba Litungulula Ilya Nte sha kwa Yehova