Umukululo wa Mepusho
◼ Bushe tufwile ukubomba shani imilimo ya pa cilonganino?
Icalenga ukuti icilonganino ca bantu ba kwa Yehova cilebomba mu muyano, kubombela capamo mu kwikatana. (1 Kor. 14:33, 40) Tontonkanyeni pa milimo ibombeka pa kulongana kumo fye ukwa pa cilonganino. Ukulunda pali programu wa kulongana, kwaba ne milimo na imbi iingi iibombwa na bamunyinefwe na bankashi pa ntanshi e lyo na pa numa ya kulongana. Kwaba ne milimo na imbi iibombwa iyabe yacindama ishimoneka na ku bantu. Lelo bushe ifwe bonse kuti twatungilila shani iyi mibombele?
Ipeelesheni. Bonse abaipeelesha ukubomba imilimo bakaba ne fingi ifya kucita. (Amalu. 110:3) Langeni ukuti mulasakamana abalwala na bakoloci. Bombeniko umulimo wa kuwamya In’ganda ya Bufumu. Kuti twabomba imilimo iingi ukwabula no wa kutwipusha ukuti tubombe. Kanshi, ico tulekabila fye, kuba ne tontonkanyo lya kufwaya ukwafwa bambi epela.
Bombeni mu kuicefya. Abantu baicefya balaba ne nsansa mu kubombela bambi. (Luka 9:48) Ukuicefya kukatucingilila ku kusakatila imilimo iingi iyo tushingabomba pa lwesu fweka. Na kabili ukuicefya kukatulenga ukukanabomfya ubulashi bwesu ukucila mu cipimo.—Amapi. 11:2.
Beni ne cishinka. Mose bamukoseleshe ukusala “abaume ba cishinka” ukubomba imilimo mu Israele wa ku kale. (Ukufu. 18:21) Imibele ya musango yo e ifwaikwa na lelo line. Ilyo mwapeelwa umulimo, bombeni bwino bwino. (Luka 16:10) Nga ca kuti tamwakabombe umulimo umo, shininkisheni ukuti mwapekanya bwino ukuti umuntu umbi akabombe uyo mulimo pa nshita mushakabepo.
Bombeni ukufika apo mwingapesha. Abena Kristu balakoseleshiwa ukubomba no mutima onse nelyo fye balebomba ku sha ncito. (Kol. 3:22-24) Kwaliba icikalamba icalenga ukubomba ukufika apo twingapesha ilyo tuleafwilisha ukupepa kwa cine. Nangula umulimo umo kuti wamoneka ukubo uunono, icilonganino conse cilanonkelamo nga ca kuti wabombwa bwino.
Umulimo onse ulatulenga ukuba ne shuko lya kulanga ifyo twatemwa Yehova e lyo na bamunyinefwe. (Mat. 22:37-39) Shi lyonse natubombe na bucishinka imilimo yonse iyo twapeelwa.