Ibungano lya Citungu Ilya Nte sha kwa Yehova Ilya mu 2005 Ilileti “Icumfwila ca Bukapepa”
1 Yehova Lesa pamo nga Kasambilisha wesu Umukalamba, alatantika ukuti tulelongana ku kusambilishiwa inshila shakwe. (Esa. 30:20, 21; 54:13) Acite ci ukupitila mu musha wa cishinka kabili uwashilimuka, uupekanya ukulongana pamo ngo kulongana kwa citungu uko tukwata cila mwaka. (Mat. 24:45-47) Tuleikatana na kemba wa malumbo Davidi, uwatile: “Mu nkuta e mo nakulacindikila Yehova.” (Amalu. 26:12) Cine cine Davidi alyumfwikishe ubucindami bwa kusambilishiwa na Yehova kabili apampamine pa kuba mu lukuta lwa bantu Bakwe lyonse ilyo balongene pamo.
2 Bushe mukaba “mu nkuta” sha bakasangwa ku Kulongana kwa Citungu ukwa uno mwaka ukuleti “Icumfwila ca Bukapepa”? Nga ni fyo, ifyebo fyakonkapo fyalamwaafwa ilyo mulepekanishisha ukusangwako.
3 Sangweniko Inshiku Shonse Shitatu: “Amapange ya wacincila yatwala ku kutuntumika.” (Amapi. 21:5) Bushe aya mashiwi tayalekomaila pa bucindami bwa kupekanishisha libela ukusangwa ku kulongana kwa citungu? Pa kuti mwikapuswa kuli uyu programu wa ku mupashi uwa kupembesula, tendekeni ino ine nshita ukucita amapekanyo ayalekabilwa pa kuti mukasangweko inshiku shonse shitatu. Nga mulefwaya ukulomba ulusa ku bene ba ncito, citeni ico ino ine nshita. Mulekabila ukwishibisha abena mwenu abashasumina ulwa mapange yenu aya kusangwa kwi bungano lya citungu ilyo kucili inshita. Ubwafya bonse ubo mwalolenkana na bo, bupepeleni kuli Yehova, mulecetekela ukuti ‘yakapampamikwa amapange yenu’ pa mulandu wa kwafwa kwakwe. (Amapi. 16:3) Kabili, kuti caba bwino ukwafwa basambi benu aba Baibolo ifya kupekanya pa kuti bakasangwe kwi bungano inshiku shonse shitatu.
4 Ukwa Kwikala: Ilingi line bamunyinefwe balaipekanishisha abene ukwikala na balupwa lwabo nelyo ne fibusa mu misumba balelonganina. Mu ncende sha ku mishi, bamunyina balakuula imisakuta nelyo basendama mu fifulo fyapekanishiwa na babomfi ba kuitemenwa abe bungano. Mu mabungano yamo yamo abeshile kwi bungano bekala umulaala abana be sukulu. Nga ca kutila mulesungwa fye na bamunyinenwe nelyo balupwa, te cisuma ukubashukila no kutontonkanya ukutila limbi kuti bamusungako pa nshiku na shimbi isha kutuusha pa numa ye bungano. Iyi miputule ya pa nshita ye bungano fye epela. Abalesungwa e lyo na bana babo bafwile ukucindika abalebasunga no kusunga bwino ifipe fya mu ng’anda ya kwa shibweni kabili tabafwile ukonaula icili conse nelyo ukukonkola mu fipe fya bene ng’anda nelyo ukwingila mu miputule nelyo ififulo fishingilako bambi icingileingile. Nga ca kutila abene mayanda bakwata amafya ya musango uyu, balingile ukwishibisha Dipartimenti wa Miputule pe bungano bwangu bwangu, kabili bamunyina kuti babombelapo.
5 Ukukabila Kwaibela: Umutumwa Paulo alondolwele aba bwananyina bamo ukuti baali ‘ica kumukoselesha.’ (Kol. 4:7-11) Inshila imo bayafwilemo Paulo ni pa kumupekanishisha ifyo alekabila. Kuti ‘mwakoselesha’ shani bambi pe bungano? Bakasabankanya abakoloci, abalwalilila, ababa mu mulimo wa nshita yonse, na bambi kuti pambi bakabila ukubafwa mu myendele nangu ukwa kwikala. Balupwa e bashingamwa sana ukusakamana aba musango yo. (1 Tim. 5:4) Lelo nga tabakwete amaka ya kucite fyo, abasumina banabo pambi kuti bayafwilishako. (Yako. 1:27) Bakangalila ba masambililo ya citabo balingile ukumona ababa mwi bumba lyabo abali no kukabila kwaibela ku kushininkisha ukuti nabaipekanya bwino bwino pa kuti bakasangwe ku kulongana kwa citungu.
6 Amaformu ya Kwipushishapo Umuputule: Nga ca kutila kasabankanya aleta Formu wa Kwipushishapo Umuputule, Komiti wa Mulimo pa Cilonganino alingile ukupitulukamo, ukubomfya ifya kupitulukilamo ifyaba pali formu. Bafwile ukumona nga kuti babombelapo abene pali uko kwipusha. Uku kupekanya kwa bakasabankanya aba misango isuma, na bana babo abaicindika epela. Nga ca kuti Dipartimenti wa Miputule ali na mepusho ayali yonse pa lwa umo uwalomba ukwa kwikala, bakepusha kalemba wa pa cilonganino.
7 Ukusangwa kwi Bungano Limbi: Pa kuti kukabe apa kwikala apakumanina, impapulo ishakumanina, ukwa kusendama, na fimbipo, bakasabankanya balekoseleshiwa ukusangwa kwi bungano ilyo icilonganino cabo cipeelwe ukusangwako. Nga ca kuti kwaba ifyalenga ukuti mukasangwe kwi bungano limbi, moneni umutande uli pe bula 5 pa kutila mwishibe inshiku sha mabungano uno mwaka mu Zambia. Tumeni Formu wa Kwipushishapo Umuputule ku cifulo mulefwaya ukuyalonganina. Nga ca kutila kukaba amabungano yabili no kucilapo mu musumba, langilileni inshiku no lulimi lwe bungano mulefwaya ukusangwako.
8 Ukucilikila Amasanso: Ukuteyanya kwa kwa Yehova kulatucinkulako pa nshita yalinga ukukuma ku mabungano. Ca bulanda ukutila pa mabungano yamo yamo mu myaka yapita, abasangilweko bamo balipililwe ifipe ku mulilo wa kuiletelela fye. Amasanso ya pa musebo na yo yalipeye abantu. Bakangalila pa mabungano na bafyashi, bale-ebwa ukusakamana sana iyi milandu yacindama pa kuti amabungano yesu yakabe aya kukuulilila kabili aya cisansamushi, ukwabula ukuloosha no bulanda pa mulandu wa mulekelesha umutumbuka amasanso.
9 Kwena icaishibikwa bwino sana ukuti e cilenga kube umulilo te kwipika fye ifya kulya mupepi ne misakuta, lelo bana bangalila ku mulilo nelyo ukwipika ukwabula ukubasopa. E ico pa kuti muicingilile mwe bene na bamunyinenwe ku masanso, mwileka abana ukulayendela ukwabula uwa kubasopa; mwipeela abana umulimo wa kubilausha menshi pa mulilo, nelyo fye ukubeba ukwipika. Limbi kuti balepika fye bwino ku ng’anda, lelo pa cifulo ce bungano te cimo na ku ng’anda kabili mufwile ukwangwako nga nshi pa kuti mucilikile amasanso. Abantu abengi bekala pamo, kabili abana balatemwa amangalo nga bali na bana banabo. Balapumfyanishiwa bwangu kabili tabamwena libela ubwafya, na pali ici tatufwile ukulabapeela kandulo, macisa nelyo amalampi. Ubwafya na bumbi bubako ilyo abafyashi baya ku kulongana mu nshita ya kasuba no kusha abana beka ku musakuta ukwabula uwa kubasopa. Abana bafwile ukupatikishiwa ukwikala pa bafyashi babo pa nshita ya programu. Nga ca kutila bakapyunga bamona abana baleendauka pe bungano ukwabula uwa kubasopa, balingile ukweba abana ukuya ku bafyashi babo. Mwe bafyashi, mukwai bombeleni pamo na babomfi ba pe bungano na muli iyi nshila mukalanga ukutila ‘mwalitemwa aba bwananyina bonse.’—1 Pet. 2:17.
10 Ifilonganino fimo filalipila aba fimbayambaya ukubatwala ku mabungano. Motoka yonse iilebomfiwa ukutwala abantu kwi bungano ilingile ukuba iituntulu sana iyasuminishiwa no kwenda pa musebo. Lyonse imyotoka taifwile ukwisula ukucila mu cipimo. Tuletubulula ukutila munyina wakosoka apeelwe umulimo wa bukapitao pa kupekanya ifi. Alingile ukulaeba ibumba lyonse apo amapekanyo yafika, ulwa nshita ya kwima no ko ibumba likalasendelwa pa kuya kwi bungano. Nga kuli ubwafya ubuli bonse ubukumine ibumba ebeni kapitao kabili akalanda ifya kucita. Nga kwaima icilekabila ukwafwa, ukupanda amano, nelyo ukubombela pa bwafya bumo, bamunyinefwe abashingamwa bakabombelapo.
11 Aba Kuitemenwa Balakabilwa: Yesu aimike ica kumwenako cafikapo ica kwangwa ifilekabila bambi. (Luka 9:12-17; Yohane 13:5, 14-16) Abaitemenwa ukubomba pa kulongana kwa citungu na bo balaba no mupashi umo wine. Pa kuti amadipartimenti pe bungano lya citungu yakabombe bwino, Bakomiti ba Mabungano nomba line bakalomba bambi ukubafwako mu mulimo wabo. Maka maka baeluda e balekabilwa ukuitemenwa no kupokelela umulimo bapeelwa. Umupashi wabo uwa kuitemenwa waba ca kumwenako cishaiwamina kuli bonse mu cilonganino.—1 Pet. 5:2, 3.
12 Ukupitila muli “kangalila wa cishinka,” Yehova Lesa uno mwaka natantikila abantu bakwe ukulongana na kumbi ku kubafunda ifya ku mupashi. (Luka 12:42) Amapekanyo ya kusangwako inshiku shonse shitatu yakakabila ukubombesha lelo cili bwino ukubombesha muli uyo musango. Ibungano lya Citungu ilya uno mwaka ilileti “Icumfwila ca Bukapepa” ukwabulo kutwishika likakosha umupampamina wesu uwa kubombela Yehova pali nomba na ku ciyayaya. Shi natupampamine ukumfwila ukukonkomesha kwa kwa kemba wa malumbo ukutila: “Cindikeni Lesa mu nkuta.”—Amalu. 68:26.
[Akabokoshi pe bula 3]
Inshita sha Kulongana
Ubushiku bwa Kubalilapo no bwa Cibili
8:45 hrs. – 16:05 hrs.
Ubushiku bwa Citatu
8:45 hrs. – 15:30 hrs.
[Akabokoshi pe bula 5]
Umutande wa Fifulo fye Bungano lya Citungu Ilya mu 2005 Ililetila “Icumfwila ca Bukapepa”
INSHIKU ICIFULO ULULIMI
AUG. 12-14 CHILILABOMBWE CW
KABWE CW
KAFUE CN
KITWE (Buchi) CW
KITWE (Chamboli) E & ASL
LUSAKA Assembly Hall (EC-03, E-09d) E & ASL
MUFULIRA CW
SOLWEZI KD
AUG. 15-17 MALAMBANYAMA CG
AUG. 16-18 KASEMPA KD
LUSWISHI CW
AUG. 17-19 NYIMBA CN
AUG. 19-21 CHINSALI CW
KAFUE CG
KAOMA SK
LUSAKA Assembly Hall (LK-06) CW
MANSA CW
NDOLA CW
AUG. 20-22 KABOMPO LV
AUG. 21-23 MUTENDA CW
AUG. 22-24 LUNDAZI CN & TB
NSAMA (Chintalima) CW
AUG. 23-25 SAMFYA CW
SENANGA SK
AUG. 24-26 LUWINGU CW
MUTOYA LD
MUYOMBE TB
AUG. 26-28 CHINGOLA CW
CHIPATA CN
KALOMO CN & CG
KASAMA CW
LUSAKA Assembly Hall (EC-01, W-03d) E & ASL
Independence Stadium CN
AUG. 28-30 MWANGE (Mporokoso) SW
SIKUNDU (Kalabo) SK
SOLWEZI CW
AUG. 29-31 KALUNGU CW
LUALABA CW
AUG. 30–SEP. 01 MULILIMA CW
AUG. 31–SEP. 02 MAPANZA CG
SEP. 01-03 KABULA CW
MWEWA CW
SEP. 02-04 KASHITU CW
KATETE CN
LUSAKA Assembly Hall (LK-07a) CW
LYENGA CN
MBALA CW
MONGU SK
MPIKA CW
MPONGWE CW
SEP. 05-07 KALA (Kawambwa) SW
KAZEMBE CW
MULOBEZI SK
SEP. 06-08 MATAMBAZI CN
SEP. 09-11 KAWA CW
LUANSHYA CW
MKUSHI CW
MUMBWA CN & CG
MUNUNGA CW
MWANDI SK
PETAUKE CN
ASL - Ululimi lwa Bankomamatwi CG - IciTonga CN - IciChewa
CW - Icibemba E - IciNgeleshi KD - CiKaonde
LD - IciLunda LV - IciLubale SK - IciLozi
SW - IciSwahili TB - IciTumbuka