Ubushiku bwa kwa Yehova Nabupalama
1 Abena Kristu balafulukisha ukwisa kwa bushiku bwa kwa Yehova, ubukesaonaula ubwikashi bwa nomba no kuleta icalo cipya umukekala ubulungami. (2 Pet. 3:12, 13) Apo tatwaishiba mu kulungatika lintu ubo bushiku bukesa, tufwile ukutwalilila ukuba abalola no kwafwa bambi ukucita cimo cine. (Esek. 33:7-9; Mat. 24:42-44) Ukutontonkanya pa Cebo ca kusesema ica kwa Lesa kukakosha isubilo lyesu ilya kuti “nabupalamo bushiku bwa kwa Yehova.”—Sefa. 1:14.
2 Ukukonkana kwa Maka ya Calo: Nga fintu calembwa pa Ukusokolola 17:9-11, umutumwa Yohane alumbula “Imfumu cinelubali (7),” ishimininako ukukonkana kwa maka ya calo cinelubali. Yohane kabili alanda na pa “mfumu yalenga cinekonsekonse (8),” iyo nomba imininako United Nations. Bushe tuleenekela na yambi amaka ya calo ukubako? Iyo, pantu ukusesema kwatila iyi mfumu yalenga cinekonsekonse ‘ileya ku bonaushi,’ pa numa ya iko tapali imfumu imbi iya pano isonde iyalumbulwa. Bushe uku kusesema kulemwafwa ukumona pantu tufikile?
3 Ibuuku lya kwa Daniele 2:31-45 lilatwafwa ukumfwikisha ukwisa kwa bushiku bwa kwa Yehova. Muli kulya kusesema, icimonwa cakulisha Nebukadnesari amwene mu ciloto cimininako ukukonkana kwa maka ya calo. Aya maka yonse kale kale yalimoneka. Mu nshita yesu maka ya calo nshi yaleteka? Tuli mu nshita iimininwako na makasa ya cimonwa. Ukusesema kulalondolola bwino bwino ifikakonkapo. Ukuteka kwa buntunse kukonaulwa, no kupyanwapo no “bufumu ubushakonaulwe.” Bushe mwamona fintu uku kusesema kulangisha ukuti ubushiku bwa kwa Yehova nabupalama?
4 Icishibilo na Cimbi: Tuli bakambone ku cishibilo na cimbi ica kuti ubushiku bwa kwa Yehova nabupalama. Tulemona ukufikilishiwa kwa mashiwi ya mutumwa Paulo ukukuma ku mibele ya bantu “mu nshiku sha kulekelesha.” (2 Tim. 3:1-5) Kabili na ifwe tulebombako umulimo wa kushimikila mu calo conse ilyo impela tailaisa. (Mat. 24:14) Lekeni ukushimikila kwesu ukwa ku cintubwingi kutwalilile ukulangisha mu kupamfya ukubilisha kwa kwa malaika ukwa kuti: “Tiineni Lesa no kumucindika, pantu yaisa inshita ya bupingushi bwakwe.”—Ukus. 14:6, 7.