‘Wilasuula Ubwaice Bobe’
1. Cinshi Paulo akonkomeshe umulumendo Timote?
1 “Wileka muntu nangu umo asuule ubwaice bobe. Lelo, ku batetekela ube ica kumwenako mu milandile, mu myendele, mu kutemwa, mu citetekelo, mu kusanguluka.” (1 Tim. 4:12) Ifi e fyo Paulo acinkwileko Timote pa bucindami bwa kubomfya amaka ya bulumendo bwakwe mu mulimo wa kwa Lesa. Timote talingile ukusuula amaka yakwe aya kwafwilishako bambi lelo alekabila ukubombesha lyonse ilyo kwabe shuko.
2. Mulimo nshi abacaice ba mu cilonganino bengabombako?
2 Uko abaice abengi bapoosa imyaka iingi ni ku sukulu. Bushe umona ukutila Isukulu cifulo cobe ica kushimikilapo ubunte bwa mu lyashi? Apo walibika amano ku fyo abafyashi bakufunda, na ku ku kulongana e lyo na ku kuisambilisha we mwine, ufwile walishiba ifingi ifyaba mu Baibolo. Kabili nga uleebako bambi ifi fintu kuti ‘waipususha we mwine na balekumfwa.’—Amapi. 1:8, 9; 1 Tim. 4:16.
3, 4. Busuma nshi bwafumine mu co umukashana umo acitile kabili bushe na iwe walicitapo ica musango yo?
3 Pa Kushukila Inshita Yonse Iyamoneka: Cila bushiku kulaba ifingalenga waebako abantu bambi ifyo waishiba. E fyo cali kuli Esther uwaba mu gredi 8 ku Southern Province. Abana be sukulu bamo baishibe kafundisha wa kwa Esther ukuti mukali sana. Bushiku bumo ilyo akalipe sana no kupaata mu kalasi, uyu kafundisha alombele ubwelelo ku bana be sukulu bonse ukubikako fye na Esther wine. Alombele ukuti, “Mulempepelako pa kuti nkaleke ifi ncita.” Esther alyumfwile ifyo kafundisha alombele kabili amutwalile Ulupungu lwa kwa Kalinda ulwa March 1, 2005, ulutila, “Kuti Mwapanga Shani Umutende na Bambi?”
4 Pa numa ya kubelenga ili lyashi kafundisha atendeke ukunashako ubukali, kabili alombele ubwelelo na kabili ku bana be sukulu. Kafundisha alembele Esther kalata pa cisuma ico acitile, atile: “Natasha pa co wancitila. Ala iyi magazini naingafwa ukwalula imibele yandi. Kale nali uwa bulanda icine cine, nomba iyi magazini naipwisha ubulanda bwandi.”
5. Mulandu nshi tushilingile ukubipilwa pe funde twapeelwa ilya ‘kukanaba ulubali lwa calo’?
5 Ukuba Uwapusanako: Nga watemwisha fye icine, wishibe ukuti icalo cikakupata, nomba, uku kutemwishe icine kukalenga no kuti ‘ulebila imbila nsuma.’—Yoh. 15:18, 19; Imil. 5:27-32; Esa. 52:7.
6, 7. Cinshi cingafumamo nga twakonka sana ifishinte fyalembwa mu Baibolo?
6 Priscar uwa ku Central Province abatishiwe ilyo ali ne myaka 11. Ilyo fye abatishiwe icitetekelo cakwe calyeshiwe. Bushiku bumo abalashi ba pa sukulu batile umwana we sukulu onse fye afwile ukubombako mwi farmu lya fwaka ilyaba muli ilya ncende. Priscar alikeene mucinshi mucinshi ukubombako. Ilyo umwana we sukulu munankwe Masia aipwishe ico akaanine, Priscar alimulondolwelele, amubelengele ifyebo fimo ifyaba mu citabo ca Ifipusho Abacaice Bepusha—Ifyasuko Fibomba.—yp ibula 272-5.
7 Uyu mwana we sukulu alisumine ukupokako broshuwa ya Cintu Lesa Afwaya ne sambililo lya Baibolo lyalitendeke. Ilyo papitile fye imyeshi 6, Masia, umusambi wa kwa Priscar, alibatishiwe. Ala icafumine muli filya Prisca ashafwaile kucita ifyo abengi balecita caliwemwe sana!—1 Pet. 5:8-10; Dan. 1:14-17.
8. Bushe Yehova akakumona shani nga ulebombesha ukuti umucindike?
8 Abaice abengi balakwata amafya pa sukulu kabili balomfwa no mwenso wa kuti nga ca kutila bambi baishiba ukuti na bo balabila imbila nsuma kuti balabaseka. Bushe kuti wacita shani nga ulefwaya icitetekelo cobe cikose pa kuti ulecimfya amesho? Tetekela Yehova no kulacita ifingateemuna Lesa. (Amapi. 29:25) Ulecankilwa mu kutila walishiba ukubomfya bwino Icebo ca kwa Lesa mu mulimo. (2 Tim. 2:15) Abantu bambi, kumo na bacaice abengi balakabila ukwishiba ifyo bengekala bwino ku ntanshi, kabili ni we Yehova akabomfya ku kubaafwa.—Mat. 21:15, 16; 2 Isha. 5:2-4.
9. Cinshi wingacita nga ulefwaya abantu ‘besuula ubwaice bobe’?
9 Mu myeshi ileisa, ukakwata amashuko ayengi aya kushimiko bunte, bushe ukashimikila? Nga waba ne mibele isuma iya Bwina Kristu e lyo no kulashimikila abantu lyonse ilyo ishuko lyamoneka, ukainonsha we mwine na bantu bambi. Kabili takuli nangu umo ‘uukasuula ubwaice bobe.’—1 Tim. 4:12.