Tufwile Ukuba Abacincila Lyonse mu Mulimo
1 Ukutula mu 1992, cila mwaka Inte sha kwa Yehova icalo fye conse balabomba amaawala ukucila pali 1 bilioni mu mulimo wa kushimikila no kupanga abasambi. Ala twaliitemwa nga nshi pa mulandu wa kuti mu mwaka wa mulimo uwa 2007 muno Zambia bakasabankanya balifulileko amapesenti yatatu, kanshi e kutila cila mweshi twalekwata bakasabankanya 127,872!
2 Lelo kwena, uo tulingile ukulumbanya ni Yehova pantu e utwafwa no kutupeela amaka ya kubomba umulimo muli ino ‘inshita yayafya.’ (2 Tim. 3:1) Nomba cinshi icifwaikwa pa kuti tutwalilile ukuba abacincila ukubomba uyu mulimo wacindama?
3 Umulandu Uo Tulingile Ukubela Abacincila: Ukutemwa sana Lesa na banensu, e lyo no mutima wa kufwaya sana ukuba lyonse abaipeela, filatucincisha ukubomba umulimo wa Bufumu. (Mat. 22:37-39; 1 Yoh. 5:3) Ukutemwa kulalenga tuleipeelesha ku kubomba nga nshi umulimo wa kubila imbila nsuma.—Luka 9:23.
4 Ibikilisheniko ku Kuba Abacincila: Umulwani wesu Kaseebanya alipimpa ukufwaya ukutunenuna ku kubomba umulimo. Imisuula ya bantu mu cifulo tubombela, ululembulo lwa ici calo, imitabotabo ya cila bushiku, e lyo no kusakamikwa pa mulandu wa bumi bwa mbali mbali e mo Satana engilila pa kufwaya ukutunenuna.
5 E ico kanshi, tulingile ukuba fye abashangila pa kuti tatutompweke. Calicindama ukukanaleka “ukutemwa uko twakwete pa kutendeka.” Pa fintu ifyo twatemenwe sana pa kutendeka paba na ukulabelenga lyonse no kulatontonkanya pa Cebo ca kwa Lesa, Baibolo, e lyo no kulabika amano ku ca kulya ca ku mupashi ico “umusha wa cishinka kabili uwashilimuka” apekanya—Ukus. 2:4; Mat. 24:45; Amalu. 119:97.
6 Amasesemo ya muli Baibolo yalelangilila fye apabuuta tuutu ukuti, ubushiku bwa kwa Yehova ubwa konaula abantu bashipepa bwile bulepalaminako fye. (2 Pet. 2:3; 3:10) E ico kanshi, lekeni tutwalilile fye ukuba abakosa mu mulimo, ukulabomba na maka yonse umulimo wa Bufumu uwa kushimikila no kupanga abasambi uo kale kale ulabombwa icalo fye conse!